گرانتتار سانى ارتۋدا. 4 جىل بۇرىن گرانت سانى 30 مىڭنان اسسا، قازىر 55 مىڭعا جەتتى. جىل سايىن گرانت سانى ارتى كەلەدى. مەملەكەت گرانت سانىن ارتتىرۋ ارقىلى كورشى رەسەي مەن قىتايعا وقۋعا كەتەتىن جاستاردىڭ اعىمىن ۇستاپ قالعىسى كەلەدى. ويتكەنى ولاردىڭ سانى سوڭعى جىلدارى كوبەيىپ، وتاندىق ستۋدەنتتەر ءۇشىن جات جەردە قولايلى ۇسىنىستار ارتۋدا.
2014 جىلى ۇبت-عا 87 564 وقۋشى تاپسىردى. ونىڭ 69 624-ءى جوو كونكۋرسىنا قاتىسىپ، 34 165-ءى گرانت يەگەرى اتاندى.
2015 جىلى ۇبت-عا 83 262 وقۋشى تاپسىردى. 67 377 جاس تۇلەك كونكۋرسقا قاتىسىپ، ونىڭ 32 168-ءى گرانت يەگەرى اتاندى.
2016 جىلى ۇبت-عا 84 042 وقۋشى تاپسىردى. 59 677 جاس تۇلەك كونكۋرسقا قاتىسىپ، ونىڭ 27 504-ءى گرانت يەگەرى اتاندى.
2017 جىل ۇبت-عا 88 583 وقۋشى تاپسىردى. 63 170 جاس تۇلەك كونكۋرسقا قاتىسىپ، ونىڭ 34 265-ءى گرانت يەگەرى اتاندى.
2018 جىل ۇبت-عا 98 698 وقۋشى تاپسىردى. 75 429 جاس تۇلەك كونكۋرسقا قاتىسىپ، ونىڭ 47 934-ءى گرانت يەگەرى اتاندى.
2019 جىل ۇبت-عا 110 472 وقۋشى تاپسىردى. 64 452 جاس تۇلەك كونكۋرسقا قاتىسىپ، ونىڭ 46 606-ءى گرانت يەگەرى اتاندى.
2020 جىل ۇبت-عا 122 717 وقۋشى تاپسىردى. 62 685 جاس تۇلەك كونكۋرسقا قاتىسىپ، ونىڭ 44 518-ءى گرانت يەگەرى اتاندى.
2021 جىلى 75 مىڭنان استام جاس تۇلەك 56 مىڭ گرانتقا ۇمىتكەر.
قازاقستاندا قالسىن دەپ، گرانتتاردىڭ سانىن كوبەيتكەن دۇرىس پا؟
بۇل تۋرالى مارات شيبۋتوۆ (ساياساتتانۋشى) بىلاي دەيدى: ۋنيۆەرسيتەتتەگى گرانت سانىنىڭ ارتۋى ءبىلىم ساپاسىنا كەرى اسەر ەتۋى مۇمكىن. ادەتتە قول جەتىمدىلىك پەن ءبىلىم ساپاسىنىڭ ءبىر-بىرىنە قاراما-قارسى تۇراتىندىعىن اڭعارعان ءجون. سالدارىنان بولاشاقتا جوو قۇنى تومەندەپ كەتۋى ىقتيمال.
دانيار ەسىمدى ستۋدەنت (ق. ساتباەۆ اتىنداعى تەحنيكالىق ۋنيۆەرسيتەتتىڭ ستۋدەنتى): "11 سىنىپتى بىتىرگەنشە، قاي جەردە، قانداي ماماندىقتا وقيتىنىمدى شەشپەدىم. تەك اعامنىڭ دوسى مەتاللۋرگيا سالاسىندا ىستەپ، جاقسى ايلىق تاپقانىن ەستىگەن سوڭ، وسى ماماندىقتى تاڭدادىم. ودان كەيىن دە "مەتاللۋرگيا" ماماندىعىمەن ەلمىزدە وڭاي جۇمىس تابۋعا بولاتىندىعىن اقپارات بەتىنەن كوزىم شالدى. ءدال قازىرگى ساتتە 3 كۋرس بىتىرسەم دە، ءتۇرلى قالالارداعى زاۋىتتار باستاپقى ايلارعا 150-200 مىڭ تەڭگە تولەپ، جۇمىسقا الۋعا ءازىر. وسى سەبەپتى ماماندىعىمنان قاتەلەسپەپپىن دەپ ويلايمىن."
جىل سايىن تەحنيكالىق گرانتتارعا گرانت كوپ بولىنسە دە، ونىڭ ورنى تولماي جاتادى. "كولىك ترانسپورتى", "تاۋ-كەن ءىسى", "مەتاللۋرگيا" ت.ب ماماندىقتارىنا كوپتەگەن جاس تۇلەكتەر مەنسىنبەي قاراپ، "مەملەكەتتىك باسقارۋ", "قارجى", "زاڭگەر", "شەت ءتىلى" جاعىن تاڭداۋعا قۇمار. الايدا تانىمال ەمەس ماماندىقتى بىتىرگەندەردىڭ جالاقىسى دا، جۇمىسقا ورنالاسۋ مۇمكىندىگى دە جوعارى.
ەلىمىزدە جىلىنا نەشە ادام جوو بىتىرەدى؟
2011 جىل - 40 485
2012 جىل - 43 401
2013 جىل - 43 585
2014 جىل - 44 548
2015 جىل - 43 346
2016 جىل -41 425
2017 جىل - 40 807
2018 جىل - 48 772
ەلىمىزدەگى تانىمال headhunter, Olx.كز ت.ب سىندى سايتتاردان جۇمىس ىزدەسەڭ، جوو بىتىرگەن مامانداردى ەمەس، كەرىسىنشە قۇرىلىس سالاسى، شاشتاراز، كولىك ايداۋشى، اسپازشى، دانەكەرلەۋشى، كۇزەتشى سىندى ماماندارعا سۇرانىس جوعارى.
ەرلان (ەلەكتريك): 11 سىنىپتى بىتىرگەندە گرانتقا بالىم جەتپەي، وقۋى ارزان دەيتىن "فيلوسوفيا" ماماندىعىن 20 شاقتى توپتاسىممەن (2-3-ءۋى ماماندىعىمەن ىستەيدى) ءبىتىرىپ شىقتىم. الايدا ارزان نەمەسە گرانت ءۇشىن ۋاقىت جوعالتپاۋ كەرەكتىگىن وقۋ اياقتاعان سوڭ عانا ءتۇسىندىم. بۇنىڭ ءبارى مەكتەپتە باعىت-باعدار بەرمەۋدىڭ كەسىرىنەن دەپ بىلەمىن. ءوز قاتەلىگىمدى تۇزەۋ ءۇشىن، قوسىمشا 2-ءشى تەحنيكالىق ماماندىقتى وقىدىم. جۇمىس بارىسىندا گەودەزيا، ماركشرەيدەر ماماندىعىمەن قىزمەت جاسايتىندار 500 مىڭنان جوعارى جالاقى ەستىگەنىمدە، نەگە سول ماماندىقتى وقىمادىم دەگەن وكىنىشتىڭ بولاتىنى دا راس.
"اتامەكەن" كاسىپكەرلەر پالاتاسىنىڭ زەرتتەۋىنە سۇيەنسەك، جوو-دا وقىعان ستۋدەنتتەردىڭ 10-نان 6-سى تاڭداعان ماماندىعى بويىنشا جۇمىسقا ورنالاسا المايدى. كوپشىلىگى ماماندىقتى ۋنيۆەرسيتەتىڭ اسەمدىگى، ماماندىقتىڭ تانىمال بولۋى، كوشتەن قالمايىق دەپ، كەز-كەلگەن ماماندىقتا وقي سالۋ، باعىت باعداردىڭ بولماۋى، تومەنگى جالاقى ت.ب سەبەپتەر اسەر ەتەدى.
وكىنىشكە قاراي، ەلىمىزدەگى جوو ءبىلىم ساپاسى الدەقايدا ارتتا قالعان. گرانت سانىنىڭ كوبەيۋى ساپالى مامانداردىڭ كوبەيۋىنە ەمەس، تەك جوو بىتىرگەن دەگەن قاعازدى بەرۋمەن شەكتەلەتىنى كوپشىلىگىمىزگە ايان.
قانات بايۇزاقوۆ
"ادىرنا" ۇلتتىق پورتالى
