28 جەلتوقساندا اقش پرەزيدەنتى دونالد ترامپ پەن ۋكراينا باسشىسى ۆلاديمير زەلەنسكي فلوريدا شتاتىندا كەزدەستى، دەپ حابارلايدى «ادىرنا» ءتىلشىسى.
كەلىسسوزدەردەن كەيىن وتكەن بىرلەسكەن ءباسپاسوز ءماسليحاتىندا اق ءۇي باسشىسى كەزدەسۋگە «وتە كەرەمەت» دەگەن باعا بەردى. ايتۋىنشا، ەكى ەل پرەزيدەنتى ەۋروپا ەلدەرى جانە ناتو باسشىلارىمەن دە تەلەفون ارقىلى سويلەسكەن.
ترامپ قوس تاراپتىڭ كوپتەگەن ماسەلەنى تالقىلاعانىن اتاپ ءوتتى.
ء«بىز ەداۋىر جاقىندادىق، ءتىپتى بەيبىت كەلىسىمگە قول جەتكىزۋگە وتە جاقىن قالدىق دەپ ويلايمىن. ۋكراينداردىڭ 91 پايىزى سوعىستىڭ اياقتالعانىن قالايدى. رەسەي دە ونى اياقتاعىسى كەلەدى. بارلىعى سوعىستىڭ بىتكەنىن قالايدى»،- دەدى ول.
ءوز كەزەگىندە زەلەنسكي كەلىسسوز قورىتىندىسى بويىنشا ۋكراينانىڭ قاۋىپسىزدىك كەپىلدىكتەرىنە قاتىستى ورتاق تۇسىنىككە كەلگەندەرىن مالىمدەپ، بەيبىت جوسپاردىڭ 90 پايىزى كەلىسىلگەنىن ايتتى.
الايدا اقش پرەزيدەنتى بەيبىت جوسپاردىڭ شامامەن 90 پايىزى تۇبەگەيلى كەلىسىلگەنىمەن، ءالى ءبىر-ەكى ماسەلە شەشىلمەي تۇرعانىن، ولاردىڭ ىشىندەگى ەڭ كۇردەلىسى — اۋماق ماسەلەسى ەكەنىن اتاپ ءوتتى.
«ۋكرايناعا كەلىسىمدى قازىر جاساعانى دۇرىس، ايتپەسە تاعى جەرىنەن ءارى ادامدارىنان ايىرىلۋى مۇمكىن»، — دەدى ترامپ.
ول ۋكراينانىڭ باتىل شايقاسقانىن ايتا كەلە، «قاقتىعىستى توقتاتاتىن ۋاقىت كەلدى» دەدى. سونىمەن بىرگە اقش پرەزيدەنتى رەتتەۋ ماسەلەلەرى ۋكراينادا جالپىۇلتتىق رەفەرەندۋم ارقىلى نەمەسە پارلامەنت ماقۇلداعاننان كەيىن شەشىلۋى ءتيىس ەكەنىن ايتتى.
سونىمەن قاتار ترامپ بولاشاقتا ۋكراينانىڭ قاۋىپسىزدىك كەپىلدىكتەرىنىڭ نەگىزگى بولىگى ەۋروپا ەلدەرىنە جۇكتەلەتىنىن تاعى دا ايتتى.
ءباسپاسوز ءماسليحاتىنىڭ سوڭىندا ترامپ پەن زەلەنسكيدىڭ كەلەسى كەزدەسۋى 29 جەلتوقساندا ءوتۋى مۇمكىن ەكەنى حابارلاندى.
