داۋرەن اسكەربەكۇلى، قوعام ءوزىڭىزدى مەملەكەتتىك يدەولوگياعا جاۋاپتى تۇلعا رەتىندە بىلەدى. ەل دامۋى جولىنداعى قايراتكەرلىك قىزمەتىڭىزدەن دە حاباردارمىز. بىراق كەشە عانا الەكساندر ترۋحاچەۆ ەسىمدى جۋرناليسكە بەرگەن سۇحباتىڭىزدا قازاق تىلىنە قاتىستى ايتقانىڭىزدى كورىپ، قولعا قالام الۋعا بەكىندىم. سۇحباتتا ايتىلعان جايتتاردى تۇيىندەي كەلە، مەندە مىناداي ءۇش سۇراق تۋىنداپ وتىر:
1. ەل ازاماتتارىنىڭ 20 پايىزى عانا ورىس بولعانىمەن، ءوزىڭىز ايتقانداي، ەل ازاماتتارىنىڭ 90 پايىزى ءالى دە ورىسشا ءبىلۋى جانە بالالاردىڭ 30 پايىزى ورىسشا وقۋى ماسقارا ەمەس پە؟ كەرىسىنشە، بۇل ەگەمەندىك العانىمىزعا 30 جىل وتسە دە، قازاق ءتىلى مەملەكەتتىك ءتىل دەگەن مارتەبەلى تۇعىرىنا قونا الماي وتىرعانىنىڭ كورىنىسى ەمەس پە؟
2. داۋكە، سۇحباتتا ايتىلعان «پەششەرنىي ناتسيوناليزم» دەگەن انىقتامانى جەتە تۇسىنبەدىم. انا تىلگە دەگەن جاناشىرلىق، ونىڭ بولاشاعىنا دەگەن الاڭداۋشىلىق بارىمىزدە دە بار. سوندا ءبارىمىز دە وسى ساناتقا جاتامىز با؟
3. بۇگىندە قوعامدا قازاق ءتىلى – ۇلتارالىق قارىم-قاتىناس تىلىنە اينالۋى كەرەك دەگەن پىكىر ورنىعىپ كەلەدى. الايدا قازىرگىدەي قالپىمىزبەن ءبىز مەملەكەتتىك ءتىلدىڭ جاعدايىن قالاي، قايتىپ جانە قاشان دۇرىستايمىز؟ بۇعان قاتىستى بيلىك باسىنداعىلاردىڭ نە ويلاعانى بار؟
مۇنداي سۇراقتار جالعىز مەندە ەمەس، قازاق ءتىلى مەن ءتول رۋحانياتىمىزعا جانى اشيتىن ءار ازاماتتا تۋىندادى عوي دەگەن سەنىمدەمىن. قالىڭ قازاقتىڭ اتىنان جولداعان ساۋال دەپ قابىلداعايسىز.
قۇرمەتپەن، مارالتاي رايىمبەكۇلى
اقىن، حالىقارالىق «الاش» سىيلىعىنىڭ لاۋرەاتى
