Däuren Äskerbekūly, qoǧam özıŋızdı memlekettık ideologiiaǧa jauapty tūlǧa retınde bıledı. El damuy jolyndaǧy qairatkerlık qyzmetıŋızden de habardarmyz. Bıraq keşe ǧana Aleksandr Truhachev esımdı jurnaliske bergen sūhbatyŋyzda qazaq tılıne qatysty aitqanyŋyzdy körıp, qolǧa qalam aluǧa bekındım. Sūhbatta aitylǧan jaittardy tüiındei kele, mende mynadai üş sūraq tuyndap otyr:
1. El azamattarynyŋ 20 paiyzy ǧana orys bolǧanymen, özıŋız aitqandai, el azamattarynyŋ 90 paiyzy älı de orysşa bıluı jäne balalardyŋ 30 paiyzy orysşa oquy masqara emes pe? Kerısınşe, būl egemendık alǧanymyzǧa 30 jyl ötse de, qazaq tılı memlekettık tıl degen märtebelı tūǧyryna qona almai otyrǧanynyŋ körınısı emes pe?
2. Däuke, sūhbatta aitylǧan «peşernyi nasionalizm» degen anyqtamany jete tüsınbedım. Ana tılge degen janaşyrlyq, onyŋ bolaşaǧyna degen alaŋdauşylyq bärımızde de bar. Sonda bärımız de osy sanatqa jatamyz ba?
3. Bügınde qoǧamda qazaq tılı – ūltaralyq qarym-qatynas tılıne ainaluy kerek degen pıkır ornyǧyp keledı. Alaida qazırgıdei qalpymyzben bız memlekettık tıldıŋ jaǧdaiyn qalai, qaitıp jäne qaşan dūrystaimyz? Būǧan qatysty bilık basyndaǧylardyŋ ne oilaǧany bar?
Mūndai sūraqtar jalǧyz mende emes, qazaq tılı men töl ruhaniiatymyzǧa jany aşityn är azamatta tuyndady ǧoi degen senımdemın. Qalyŋ qazaqtyŋ atynan joldaǧan saual dep qabyldaǧaisyz.
Qūrmetpen, Maraltai Raiymbekūly Aqyn, Halyqaralyq «Alaş» syilyǧynyŋ laureaty
