Dáýren Áskerbekuly, qoǵam ózińizdi memlekettik ıdeologııaǵa jaýapty tulǵa retinde biledi. El damýy jolyndaǵy qaıratkerlik qyzmetińizden de habardarmyz. Biraq keshe ǵana Aleksandr Trýhachev esimdi jýrnalıske bergen suhbatyńyzda qazaq tiline qatysty aıtqanyńyzdy kórip, qolǵa qalam alýǵa bekindim. Suhbatta aıtylǵan jaıttardy túıindeı kele, mende mynadaı úsh suraq týyndap otyr:
1. El azamattarynyń 20 paıyzy ǵana orys bolǵanymen, ózińiz aıtqandaı, el azamattarynyń 90 paıyzy áli de oryssha bilýi jáne balalardyń 30 paıyzy oryssha oqýy masqara emes pe? Kerisinshe, bul egemendik alǵanymyzǵa 30 jyl ótse de, qazaq tili memlekettik til degen mártebeli tuǵyryna qona almaı otyrǵanynyń kórinisi emes pe?
2. Dáýke, suhbatta aıtylǵan «peernyı naıonalızm» degen anyqtamany jete túsinbedim. Ana tilge degen janashyrlyq, onyń bolashaǵyna degen alańdaýshylyq bárimizde de bar. Sonda bárimiz de osy sanatqa jatamyz ba?
3. Búginde qoǵamda qazaq tili – ultaralyq qarym-qatynas tiline aınalýy kerek degen pikir ornyǵyp keledi. Alaıda qazirgideı qalpymyzben biz memlekettik tildiń jaǵdaıyn qalaı, qaıtip jáne qashan durystaımyz? Buǵan qatysty bılik basyndaǵylardyń ne oılaǵany bar?
Mundaı suraqtar jalǵyz mende emes, qazaq tili men tól rýhanııatymyzǵa jany ashıtyn ár azamatta týyndady ǵoı degen senimdemin. Qalyń qazaqtyń atynan joldaǵan saýal dep qabyldaǵaısyz.
Qurmetpen, Maraltaı Raıymbekuly
Aqyn, Halyqaralyq «Alash» syılyǵynyń laýreaty
