قازىرگى تاڭدا ىندەتتەن تۋىنداعان قيىندىقتارعا قاراماستان، ءبىرىنشى جارتىجىلدىقتىڭ قورىتىندىسى بويىنشا قالا ەكونوميكاسىندا وڭ دامۋ ديناميكاسى قالىپتاسىپ وتىر.ەكونوميكانى قۇرايتىن نەگىزگى كورسەتكىشتەر ءوسىمى قامتاماسىز ەتىلىپ، كۇردەلى كەزەڭدە حالىقتىڭ تابىسىن ساقتاپ، ونىڭ ءال-اۋقاتىن ارتتىرۋ جونىندەگى مىندەتتەر تابىستى ىسكە اسىرىلۋدا.
اتاپ ايتار بولساق، بيىلعى قاڭتار-ماۋسىم ايلارىندا شىمكەنت قالاسىنداعى ءوندىرىس ورىندارىندا 355 ملرد. تەڭگەنىڭ ءونىمى شىعارىلىپ، بىلتىرعى جىلدىڭ ءتيىستى كەزەڭىمەن سالىستىرعاندا 7,2 پايىزعا ارتتى. ال اۋىلشارۋاشىلىعى سالاسىندا ءوسىم 2,1 پايىز بولىپ، ونىدىرىلگەن ءونىم كولەمى 17,2 ملرد. تەڭگە بولدى.شىمكەنت ينۆەستيتسيا تارتۋدان دا الدىڭعى ورىنداردا. ءبىرىنشى جارتىجىلدىقتا قالا ەكونوميكاسىنا تارتىلعان ينۆەستيتسيا كولەمى 131,8 ملرد تەڭگەگە جەتىپ، بىلتىرعى جىلدىڭ ءتيىستى كەزەڭىمەن سالىستىرعاندا 18,9 پايىزعا ءوستى. قۇرىلىس جۇمىستارى 50,1 ملرد. تەڭگەگە جەتىپ، 15,6 پايىز ءوسىمدى كورسەتتى. ال بولشەك ساۋدانىڭ ۇلەسى 198, 5 ملرد تەڭگەنى قۇراپ، 9,6 پايىزعا ارتسا، تۇرعىن ءۇي 276,3 ملرد تەڭگە بولىپ، 1,9 پايىزعا ءوستى. قالا اۋماعىندا ارەكەت ەتەتىن 3 وندىرىستىك ايماقتا 110 كاسىپورىن بەلسەندى جۇمىس ىستەپ، 7680 تۇراقتى جۇمىس ورىندارى اشىلعان. ەسەپتى كەزەڭدە وسى ايماقتاردا قۇنى 1,8 ملرد. تەڭگەنى قۇرايتىن 4 جوبا ىسكە اسىرىلىپ، جاڭا 274 جۇمىس ورنى اشىلدى. شىمكەنت قالاسىندا كاسىپكەرلىكتى دە قولداۋعا باسىمدىق بەرىلىپ وتىر. سونىڭ ناتيجەسىندە كاسىپكەرلىكتى قولداۋ باعدارلاماسىنا باعىتتالعان قارجى كولەمى بيىلعى التى ايدا ەكى ەسە ۇلعايىپ، 7 ملرد. تەڭگەگە جەتتى. ەسەپتى كەزەڭدە 931 جوباعا 2,5 ملرد. تەڭگەگە قولداۋ كورسەتىلىپ، تۇرعىندار اراسىندا كاسىپكەرلىكتى دامىتۋعا مۇمكىندىك بەرىلدى.
