رەسەيدىڭ قورعانىس ءمينيسترى سەرگەي شويگۋدىڭ رەسەي استاناسىن سىبىرگە كوشىرەمىز دەگەن سوزىندە جان بار سياقتى. رەسەي قورعانىس ءمينيسترى بۇل ءسوزىن سەنىمدى تۇردە ايتىپ وتىر. ونىڭ نەگىزگى ءارى باستى سەبەپتەرى دە جوق ەمەس.
رەسەيدىڭ ءسىبىر ايماعىندا تۇتاس رەسەيمەن قوسا العاندا مىستىڭ 50 پايىزى، نيكەلدىڭ 75 پايىزى، پلاتينانىڭ 90 پايىزى جاتىر.
مۇنداي ءوندىرىس وشاقتارىنىڭ باستى يەلەرى ءدال قازىر - قىتاي. قىتايدىڭ ءوندىرىس سالاسىنداعى ۇلەسىن تومەندەتۋ ماقساتىندا دا رەسەي بيلىگىندە لوببيستتىك ارەكەتتەر ىسكە اسۋدا. "ريا نوۆوستيگە" بەرگەن سۇحباتىندا رەسەيدىڭ قورعانىس ءمينيسترى سىبىردەگى بارلىق ءوندىرىس وشاقتارىن رەسەيدىڭ وزىنە قايتارۋ كەرەك دەگەن پىكىرىن ايتىپ قالدى. سىبىردەن شىعاتىن شيكىزاتتاردان اككۋمۋلياتور مەن ەلەكتروقوزعالتقىشتارعا قاجەتتى بارلىق پايدالى قازبالار شىعادى.
سونىمەن قاتار رەسەيدىڭ سىبىردەگى بايلىعىنا ەۋروپا مەن اقش-تا قىزىعۋشىلىق ءبىلدىرىپ كەلەدى. ولاردىڭ دا ەكونوميكالىق مۇددەسى وسى تۇستا قيىسادى. سوندىقتان رەسەيدىڭ قورعانىس ءمينيسترى وسى وڭىرگە بارلىق عالىمدار مەن مامانداردى تارتۋدى ىسكە اسىرۋ كەرەكتىگىن ايتىپ، ءوندىرىس ورىندارىن تەزدەتىپ سالىپ، ارەكەتكە كوشۋدى ايتا كەتتى.
سەرگەي شويگۋ كراسنويارسكدەگى عالىمدارمەن كەزدەسۋىندە دە وسى پىكىرىن ايتقان بولاتىن.
بىراق، جۋىق ارادا رەسەيدىڭ استاناسى سىبىرگە كوشە سالادى دەگەنگە ەشكىم دە سەنە قويماس. دەگەنمەن ءمينيستردىڭ ايتىپ وتىرعان پىكىرىنىڭ ستراتەگيالىق ماڭىزى بار ەكەنى ايدان انىق.
بەكبولات قارجان،
"ادىرنا" ۇلتتىق پورتالى
