رەسەيلىك دەپۋتات ەۆگەني فەدوروۆ كسرو قۇرامىندا بولعان مەملەكەتتەرتىڭ وداقتان شىعۋىن زاڭسىز ءىس-ارەكەت دەپ اتادى. ونىڭ مالىمدەمەسىن «پۋتين ۆ Telegram» ارناسى جاريالادى، دەپ حابارلايدى «ادىرنا» ءتىلشىسى.
«زاڭسىز بولىنگەن رەسپۋبليكالاردىڭ ءبارى ەرتە مە، كەش پە، رەسەيمەن قاقتىعىسادى نە سوعىسادى. بۇل — تەوريا ماسەلەسى. قاقتىعىستاردىڭ كەيبىرەۋى قازىر بولمايدى، ماسەلەن بەلارۋستى الايىق. گرۋزيا سوعىسقان، ۋكراينا. بۇنىڭ ارمەنياعا دا قاتىسى بار.
ءبىز كەڭەس وداعىنىڭ بارلىق رەسپۋبليكاسىمەن قارىم-قاتىناسىمىزدى زاڭ نەگىزىندە قايتا قۇرماساق، ياعني حالىقارالىق تالاپتاردى ەسكەرە وتىرىپ، ولاردىڭ قازىرگى جاعدايى تۋرالى كەلىسسوزدەر جۇرگىزبەسەك، ءبىر كۇنى سوعىسامىز»،—دەدى ول.
دۋما دەپۋتاتىنىڭ بۇل سوزىنە قازاقستان بيلىگى ازىرگە ەشتەڭە ايتپادى. ال وزبەكستان دەپۋتاتى وديلجون توجيەۆ فەدوروۆتى كەزەكتى قيالشىل ادامداردىڭ بىرىنە تەڭەدى.
«كەڭەس وداعىنان زاڭسىز تۇردە شىققان رەسپۋبليكالار 14/09 زاڭىن بۇزدى دەيدى. فەدوروۆ كونستيتۋتسيانىڭ بارلىق زاڭنان جوعارى تۇرعانىن تۇسىنبەسە كەرەك. سونىمەن، كسرو كونستيتۋتسياسىنىڭ 72-بابىندا: «ءاربىر وداقتاس رەسپۋبليكا ءۇشىن كسرو-دان ءوز ەركىمەن شىعۋ قۇقىعى ساقتالادى»،—دەپ كورسەتىلگەن»،— دەدى توجيەۆ.
