بىلتىر مەملەكەت باسشىسىنىڭ تاپسىرماسىمەن قر پرەمەر-ءمينيسترىنىڭ قاۋلىسىمەن 10 تامىز — اباي كۇنى بولىپ بەلگىلەنگەن بولاتىن. بيىل قازاقستاندىقتار اباي كۇنىن ەكىنشى جىل اتاپ وتۋدە.
وتكەن جىلى ۇلى اقىننىڭ 175 جىلدىعىنا وراي الەمدە جانە ەلىمىزدە كوپتەگەن ءىس-شارالار ءوتتى. بيىل، وكىنىشكە قاراي، ەلىمىزدە پاندەمياعا بايلانىستى كوپ شارالار ونلاين فورماتتا وتكىزىلىپ جاتىر.
ءبىز اباي كۇنىندە شەت ەلدەردە ۇلى اقىننىڭ ەسىمى بەرىلگەن كوشەلەر مەن ونىڭ قۇرمەتىنە ورناتىلعان ەسكەرتكىشتەر تۋرالى بىرقاتار دەرەكتەر ۇسىنامىز:
*1988 جىلدان بەرى ۋكراينانىڭ استاناسى كيەۆتە اباي قۇنانبايۇلى اتىنداعى كوشە بار. سونداي-اق ۇلى اقىن اتىنداعى كوشە كراماتورسك، دنەپروپەتروۆسك قالالارىندا دا اشىلعان.
*مىسىر استاناسى — كايردە اباي اتىنداعى كوشە 1998 جىلى اشىلسا، بەرليندە (گەرمانيا) 2000 جىلى اباي-شتراسسە اشىلعان. سونىمەن قاتار تاشكەنت (وزبەكستان), بىشكەك (قىرعىزستان) قالالارىندا، ءتىپتى ءۇندىستان استاناسى نيۋ-دەليدە دە اباي قۇنانبايۇلى اتىنداعى كوشە بار. ليۋكسەمبۋرگتەن دە اقىن اتىنداعى كوشەنى كەزدەستىرەسىز.
*1995 جىلى 15 اقپاندا الەمنىڭ ورتالىعى سانالاتىن لوندون قالاسىندا (ۇلىبريتانيا) روللان سەيسەمباەۆتىڭ باستاماسىمەن اباي ءۇيى اشىلدى.
*2006 جىلى رەسەي استاناسى ماسكەۋدىڭ "چيستىە پرۋدى" بۋلۆارىندا اباي ەسكەرتكىشى اشىلدى. ەسكەرتكىش قازاقستان ەلشىلىگى ماڭايىنا قويىلعان.
*2007 جىلى يران يسلام رەسپۋبليكاسىنىڭ استاناسى تەگەران قالاسىندا اباي ءمۇسىنى اشىلدى. ءمۇسىن ۇلتتىق كىتاپحاناعا كىرەبەرىس اللەيادا ورناتىلعان. سونداي-اق يران ۇلتتىق كىتاپحاناسىندا دا ابايدىڭ ءمۇسىنى قويىلعان.
*2011 جىلى ءازىربايجان استاناسى باكۋدە اباي قۇنانبايۇلىنىڭ اتىمەن اتالعان كوشەنىڭ سالتاناتتى اشىلۋ ءراسىمى ءوتتى.
*2013 جىلى تاشكەنتتەگى اباي كوشەسىندە اقىن ەسكەرتكىشى بوي كوتەردى.
*2014 جىلى قىتاي استاناسى بەيجىڭنىڭ ورتالىعىنداعى "چاويان" ساياباعىندا ابايعا ارنالعان ەسكەرتكىش اشىلدى.
*2014 جىلى ۆەنگريا استاناسى بۋداپەشتتەگى استانا كوشەسىنە ابايدىڭ ەسكەرتكىشى ورناتىلدى.
ال وتكەن جىلى اباي قۇنانبايۇلىنىڭ 175 جىلدىق مەرەيتويىنا وراي:
*چەحيا استاناسى پراگا قالاسىنىڭ كلەمەنتينۋم اتىنداعى ۇلتتىق كىتاپحانادا "اباي" مادەني-اقپارات ورتالىعى اشىلدى.
*ارمەنيا استاناسى ەرەۆانداعى ەرەۆان مەملەكەتتىك ۋنيۆەرسيتەتى جانىنداعى قازاق ءتىلى، تاريحى جانە مادەنيەتى ورتالىعىنا اباي قۇنانبايۇلىنىڭ اتى بەرىلدى.
*قاراقالپاقستاننىڭ (وزبەكستان) مويناق قالاسىندا اشىلعان "شايىرلار" ساياباعىنا اباي ءمۇسىنى ورناتىلدى.
ء*ازىربايجاننىڭ باكۋ قالاسىندا ابايعا ورناتىلعان ەسكەرتكىش تاقتا قايتا جاڭارتىلدى. سونداي-اق باكۋ قالاسىنداعى كوشەلەردىڭ بىرىنە اباي قۇنانباەۆتىڭ ەسىمى بەرىلدى.
*بولگاريانىڭ سۆەتي ۆلاس قالاسىنداعى تانىمال تۇلعالار اللەياسىندا اباي بارەلەفى اشىلدى. وندا: "ادام بالاسىن زامان وسىرەدى، كىمدە-كىم جامان بولسا، ونىڭ زامانداسىنىڭ ءبارى كىنالى", — دەپ ابايدىڭ وتىز جەتىنشى قاراسوزىنەن ءۇزىندى كەلتىرىلگەن.
*رۋمىنيانىڭ بۋحارەست قالاسىنىڭ ورتالىعىنا ابايدىڭ ءبيۋستى ورناتىلدى.
*تۇركيانىڭ انتاليا قالاسىندا اباي اتىنداعى ساياباق پايدالانۋعا بەرىلدى.
*ليتۆا استاناسى ۆيلنيۋس قالاسىندا اباي اتىنداعى وقۋ زالى سالتاناتتى تۇردە اشىلدى.
*بىرىككەن اراب امىرلىكتەرىندەگى قازاقستان ەلشىلىگىنىڭ عيماراتىندا "اباي" مادەني-تانىمدىق زالى وقىرماندارعا ەسىگىن اشتى.
*تاشكەنت قالاسىندا "Abaı Úıi" قازاق مادەني-ىسكەرلىك ءۇيى اشىلدى.
*مالايزيانىڭ كۋالا-لۋمپۋر قالاسىنداعى ۇلتتىق كىتاپحانادا اباي اتىنداعى قازاق ادەبيەتى مەن مادەنيەتى ورتالىعى پايدالانۋعا بەرىلدى. جانە ابايدىڭ "قاراسوزدەرى" العاش رەت مالاي تىلىنە اۋدارىلدى.
*"وتانداستار قورى" كەاق رەسەيدىڭ ومبى قالاسىندا، بىشكەكتە (قىرعىزستان), بەرليندە (گەرمانيا), ىستامبۇل قالاسىندا (تۇركيا) "Abai Úıi" قازاق مادەني-ىسكەرلىك ءۇيىن اشتى.
سونداي-اق بىلتىر ۇلى ابايدىڭ شىعارمالارى العاش رەت سلوۆاك، جاپون، يندونەزيا، چەح، وزبەك، مالاي تىلدەرىنە اۋدارىلدى.
ال سەمەيدە تۇساۋكەسەرى وتكەن "اباي الەمى" كىتاپتار توپتاماسىنا قازاق، ورىس جانە اعىلشىن تىلدەرىندەگى 22 كىتاپ ەنگىزىلدى. كىتاپتار ارقىلى وقىرماندار تەك ابايدىڭ شىعارمالارىمەن عانا تانىسىپ قويماي، سونىمەن قاتار اقىننىڭ بالالارىنىڭ جانە ءىزباسارلارىنىڭ ەڭبەكتەرىن دە وقي الادى.
"ادىرنا" ۇلتتىق پورتالى.
