تالدىقورعاندا اقىن، ۇلى ويشىل اباي قۇنانبايۇلىنىڭ ەسكەرتكىشىنە گۇل شوقتارىن قويۋ ءراسىمى ءوتتى. ءىس-شاراعا جەتىسۋ وبلىسىنىڭ اكىمى بەيبىت يساباەۆ، زيالى قاۋىم وكىلدەرى، مادەنيەت جانە ونەر قايراتكەرلەرى، ارداگەرلەر، جاستار مەن قالا تۇرعىندارى قاتىستى. اباي كۇنى اياسىندا وڭىردە 119 ءتۇرلى مادەني-اعارتۋشىلىق ءىس-شارا ۇيىمداستىرىلدى، –دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
«اباي – دانالىقتىڭ دارا شىڭى» اتتى سالتاناتتى ءىس-شارا 2023 جىلى اباي ەسكەرتكىشى ورناتىلعان ب. ريموۆا اتىنداعى اكادەميالىق دراما تەاترى الدىنداعى الاڭدا ءوتتى. گۇل شوقتارىن قويۋ راسىمىنەن باستالعان شارا جاس اباي مەن كەمەل ابايدىڭ كەزدەسۋىن بەينەلەگەن تەاترلاندىرىلعان پرولوگپەن جالعاستى. وندا كەمەل اباي ءوزىنىڭ جاس شاعىنداعى بەينەسىنە ادامنىڭ كوركى – ونىڭ ءبىلىمى، ءوزىن-ءوزى جەتىلدىرۋى جانە حالقىنا قىزمەت ەتۋىندە ەكەنىن وسيەت ەتتى.
كەش بارىسىندا «ميزام» كوشپەلى ادەبي مەكتەبىنىڭ وقۋشىلارى ابايدىڭ ولەڭدەرىن مانەرلەپ وقىدى. جاس قاتىسۋشىلاردىڭ اسەرلى ورىنداۋى كەشتىڭ ەڭ جىلى ساتتەرىنىڭ بىرىنە اينالىپ، اباي پوەزياسىنىڭ جاس ۇرپاقتىڭ جۇرەگىنەن ءالى دە ورىن الىپ كەلە جاتقانىن كورسەتتى.
باعدارلامانىڭ ەرەكشە بولىگىنىڭ ءبىرى مۋزىكالىق ءبولىم بولدى. جەرگىلىكتى ونەرپازدار ابايدىڭ «كوزىمنىڭ قاراسى»، «جەلسىز تۇندە جارىق اي» جانە باسقا دا اندەرىن ورىنداپ، كورەرمەندەرگە ونىڭ مۋزىكالىق مۇراسىنىڭ كوركەمدىگى مەن تەرەڭدىگىن جەتكىزدى.
– كەشتىڭ اشىق اسپان استىندا ءوتىپ، وعان كەز كەلگەن ادامنىڭ قاتىسا الاتىنى ماعان وتە ۇنادى. ءوزىم ءومىر بويى مەكتەپتە قازاق ءتىلى مەن ادەبيەتى ءپانىنىڭ مۇعالىمى بولىپ جۇمىس ىستەدىم. سوندىقتان بۇل كەش ماعان ەرەكشە اسەر ەتتى. ءبىلىم، ەڭبەك، ادىلدىك، ادامگەرشىلىك جانە رۋحاني كەمەلدەنۋ قۇندىلىقتارىنا نەگىزدەلگەن اباي شىعارماشىلىعى بۇگىن دە وزەكتىلىگىن جوعالتقان جوق. سوندىقتان وسىنداي ءىس-شارالار ونىڭ ادامگەرشىلىك جانە فيلوسوفيالىق يدەيالارىنىڭ ماڭىزىن تاعى ءبىر مارتە ەسكە سالادى، – دەپ پىكىرىمەن ءبولىستى وبلىس ورتالىعىنىڭ تۇرعىنى، زەينەتكەر دانيا جاقىپوۆا.
ونىڭ پىكىرىن قالانىڭ جاس بۋىن وكىلى دە قولدادى:
– مەن ابايدىڭ ولەڭدەرىمەن سۋسىنداپ ءوستىم. ەسەيگەن سوڭ دا ولاردى وقۋدى جالعاستىرىپ كەلەمىن. ويتكەنى ءار جاستا ونىڭ شىعارمالارىنان جاڭا ءمان تاباسىڭ. بۇگىندە دە ونىڭ ولەڭدەرى مەن قارا سوزدەرى وزەكتىلىگىن جوعالتقان جوق. اباي – ءبىزدىڭ ماڭگىلىك مۇرامىز. ونى ءبىلۋ، قۇرمەتتەۋ جانە وسكەلەڭ ۇرپاق اراسىندا كەڭىنەن ناسيحاتتاۋىمىز قاجەت، – دەدى جانات ساناتۇلى.
وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى قۋانىش سۇلەيمەنوۆ بۇگىن وبلىستىڭ كىتاپحانالارىندا اشىق ەسىك كۇنى ۇيىمداستىرىلعانىن اتاپ ءوتتى. كىتاپحانالار كەلۋشىلەر ءۇشىن تۇنگى ساعات 00:00-گە دەيىن جۇمىس ىستەپ، ءتۇرلى رۋحاني-اعارتۋشىلىق جانە مادەني-تانىمدىق باعدارلامالاردى ۇسىنۋدا.
جالپى، 1-10 تامىز ارالىعىندا اباي كۇنىنە وراي جەتىسۋ وبلىسىندا 119 ءىس-شارا وتكىزىلدى.
