مەملەكەت باسشىسى قاسىم-جومارت توقاەۆ قازاقستاندىقتاردى اباي كۇنىمەن قۇتتىقتادى. بۇل تۋرالى اقوردا جازدى، دەپ حابارلايدى "ادىرنا".
"قۇرمەتتى وتانداستار! بارشاڭىزدى اباي كۇنىمەن شىن جۇرەكتەن قۇتتىقتايمىن!
ۇلى ويشىلدىڭ شىعارماشىلىق ءارى زياتكەرلىك مۇراسى الەمدىك جانە ۇلتتىق مادەنيەتتىڭ اسىل قازىناسى قاتارىنان ايرىقشا ورىن الادى. اباي ءىلىمى – رۋحاني شامشىراعىمىز، اينىماس تەمىرقازىعىمىز. اقىن جۇرتشىلىقتى تولعاندىراتىن كوكەيكەستى ماسەلەلەردى بۇكپەسىز ايتىپ، حالقىمىزدى بەيقامدىق پەن جالقاۋلىقتان اۋلاق بولۋعا شاقىردى. حاكىمنىڭ "تولىق ادام" يدەياسى – ءاربىر ازاماتتى رۋحاني كەمەلدەنۋگە ۇندەيتىن جانە ەشقاشان وزەكتىلىگىن جوعالتپايتىن مازمۇنى تەرەڭ تۇجىرىم.
بيىل اباي كۇنى ەلىمىزدە جۇرگىزىلىپ جاتقان اۋقىمدى وزگەرىستەرمەن تۇسپا-تۇس كەلىپ وتىر. قازاقستاننىڭ حالىق كونستيتۋتسياسى زاڭدى كۇشىنە ەنىپ، بيلىكتىڭ بارلىق ينستيتۋتتارىن تۇبەگەيلى جاڭعىرتۋ ۇدەرىسى باستالدى. بۇل – شىن مانىندە، ۇزاق مەرزىمگە ارنالعان دامۋ باعدارىمىزدى ايقىندايتىن ەرەكشە كەزەڭ. كوپ ۇزاماي ەل تاريحىندا العاش رەت قۇرىلتاي سايلاۋى وتەدى. ءبىر پالاتالى پارلامەنت رەفورمالاردى ساپالى ءارى ءتيىمدى جۇزەگە اسىرۋعا تىڭ سەرپىن بەرەتىنى ءسوزسىز.
بۇل وزگەرىستەردىڭ تۇپكى ءمانى – جاسامپازدىق قۇندىلىقتارىن ازاماتتاردىڭ ساناسىنا ءسىڭىرىپ، قازاقستاننىڭ تىڭ قارقىنمەن دامۋىنا جول اشۋ. ءبىز قوعامدا جاڭا ەتيكانى قالىپتاستىرۋ، ۇلتتىق بىرەگەيلىكتى نىعايتۋ جانە گۋمانيستىك يدەالداردى دارىپتەۋ بارىسىندا ءاردايىم ابايعا جۇگىنەمىز. ۇلى اقىن حالىقتىڭ بولاشاعى ءۇشىن بىلىمپازدىق، ەڭبەكقورلىق، جاۋاپكەرشىلىك سىندى قاسيەتتەر وتە ماڭىزدى ەكەنىن ۇعىندىردى، كورەگەندىك تانىتىپ، جۇرتتى بىرلىك پەن كەلىسىمدى ساقتاۋعا شاقىردى. اباي قارا سوزدەرىنىڭ تاعىلىمى قازىرگى قازاقستاننىڭ قۇندىلىقتارىمەن تولىق ۇندەسەدى. "ادال ازامات", "تازا قازاقستان", "زاڭ مەن ءتارتىپ" تۇعىرنامالىق يدەيالارى – اباي ارمانداعان بەرەكەلى قوعامنىڭ بەرىك نەگىزى. سوندىقتان، ءبىز ادىلەتتى، وزىق ءارى قۋاتتى قازاقستاندى قۇرىپ جاتىرمىز.
ۇلى ويشىلدىڭ مول مۇراسى الداعى ۋاقىتتا دا وسكەلەڭ ۇرپاقتى شىنايى وتانشىلدىق پەن تۋعان ەلگە سۇيىسپەنشىلىك رۋحىندا تاربيەلەۋ ىسىندە رۋحاني ازىق بولادى دەپ سەنەمىن.
بارشاڭىزعا اماندىق جانە تابىس تىلەيمىن! اباي كۇنى قۇتتى بولسىن!"- دەلىنگەن پرەزيدەنت قۇتتىقتاۋىندا.
