ءوڭىر باسشىسى ماحامبەت دوسمۇحامبەتوۆ وبلىستىڭ باس يمامى التىنبەك ۇتىسحانۇلىن قابىلدادى.
باس يمام قۇربان ايت مەركەسىنە قاتىستى اتقارىلىپ جاتقان جۇمىستاردى باياندادى.
«قازىرگى كەزدە قۇربان ايت مەيرامىنا دايىندىق جۇمىستارى قىزۋ جۇرگىزىلىپ جاتىر. ەلدەگى ەپيدەميولوگيالىق جاعدايعا بايلانىستى، قۇربان شالۋ بيىل دا قاشىقتىقتان وتەدى. بىراق، سانيتارلىق تالاپتاردى قاتاڭ ساقتاي وتىرىپ، ءوز ۇيىندە قۇربان شالاتىندارعا دا مۇمكىندىك قاراستىرىلىپ وتىر. اكىمدىكتىڭ قولداۋىمەن ارنايى شتاب قۇرىلىپ، مال بازارلارى تەكسەرىلىپ، قۇرباندىق شالۋ ورىندارى بەلگىلەندى»،-دەدى ا.ۇتىسحانۇلى.
باس يمامنىڭ ايتۋىنشا، 20-22 شىلدە ارالىعىندا وتەتىن قۇربان ايت كەزىندە حالىق جاپپاي جينالاتىن جەردە قۇرباندىق شالۋعا تىيىم سالىنعانمەن، ءدىني ءراسىمدى اركىمنىڭ ءوز اۋلاسىندا وتكىزۋگە رۇقسات ەتىلەدى. سونىمەن قاتار، ەت ساقتايتىن توڭازىتقىشتار دايىندالىپ، مۇقتاج وتباسىلاردىڭ دا ءتىزىمى جاساقتالعانىن ايتتى.
«بىلتىرعىدان تاجىريبەمىز بار. قۇربان ايتتى حالىقتىڭ كوڭىلىنەن شىعاتىنداي ەتىپ دۇرىس ۇيىمداستىرۋ — ۇلكەن جاۋاپكەرشىلىك»،-دەگەن وبلىس اكىمى ماحامبەت دوسمۇحامبەتوۆ اتالعان ءىس-شارانى ويداعىداي وتكىزۋ كەرەكتىگىن ايتتى.
سونداي-اق، ول قۇربان ايت مەرەكەسىنە وراي اتىراۋلىقتاردى قۇتتىقتادى.
