الماتى وبلىسىندا 20 جىلعا جۋىق ۋاقىت بۇرىن جاسالعان كىسى ءولتىرۋ ءىسى بويىنشا ءۇشىنشى ايىپتالۋشى 16 جىلعا سوتتالدى، دەپ حابارلايدى “ادىرنا” ۇلتتىق پورتالى.
الماتى وبلىسىنىڭ پروكۋراتۋراسى 2006 جىلدىڭ قىركۇيەگىندە بولعان قىلمىستى تەرگەۋدى اياقتاعان. ۆەدومستۆو مالىمەتىنشە، ءۇش ەر ادام تاكسي جۇرگىزۋشىسى رەتىندە ايەلدى كولىككە وتىرعىزعان. كەيىن ونى تۇنشىقتىرىپ ءولتىرىپ، جەكە زاتتارىن ۇرلاپ، ءمايىتىن الماتى–قاپشاعاي اۆتوجولىنىڭ بويىنا تاستاپ كەتكەن.
2007 جىلى سوت ەكى سىبايلاسىن ايىپتى دەپ تانىعان. ال ءۇشىنشى كۇدىكتىگە قاتىستى ءىس جۇرگىزۋ توقتاتىلىپ، ماتەريالدار ارحيۆكە جىبەرىلگەن. قىلمىس اشىلماعان ىستەر تىزىمىنە دە ەنگىزىلمەگەن.
كەيىن پروكۋراتۋرا وتكەن جىلدارداعى ماتەريالدارعا تەكسەرۋ جۇرگىزىپ، تەرگەۋدى قايتا جانداندىردى. انىقتالعانداي، ءىس نەگىزسىز توقتاتىلىپ، كۇدىكتىنى ىزدەستىرۋ ءتيىستى دەڭگەيدە باقىلاۋعا الىنباعان. قوسىمشا سۇراۋ سالۋلار مەن دەرەكتەردى سالىستىرۋ ناتيجەسىندە قۇقىق قورعاۋ ورگاندارى كۇدىكتىنى قاراساي اۋدانىنان انىقتاپ، ۇستاعان.
