سەمەيدەگى ويىن-ساۋىق ورتالىقتارىنىڭ بىرىندە ءىرى ءورت تىركەلدى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىلەردە تاراعان بەينەجازبالاردان وقيعا كەزىندە كەلۋشىلەردىڭ، ونىڭ ىشىندە بالالاردىڭ دا سىرت كيىمسىز عيماراتتان جەدەل تۇردە ەۆاكۋاتسيالانعانى كورىنەدى. وقيعا ايازدى كۇنى بولعاندىقتان، بۇل جاعداي تۇرعىندار اراسىندا الاڭداۋشىلىق تۋعىزدى.
توتەنشە جاعدايلار مينيسترلىگىنىڭ مالىمەتىنشە، العاشقى ءورت ءسوندىرۋ بولىمشەلەرى جەتكەن كەزدە عيمارات تولىقتاي اشىق جالىنعا ورانعان. ءورتتىڭ كۇشەيۋى سالدارىنان شاتىردىڭ ءبىر بولىگى قۇلاعان.
الدىن الا اقپارات بويىنشا، ادامدار عيماراتتان ءوز بەتىنشە شىعىپ ۇلگەرگەن. زارداپ شەككەندەر تۋرالى ناقتى مالىمەت ازىرگە جاريالانعان جوق.
قۇتقارۋشىلاردىڭ ايتۋىنشا، ءورتتى ءسوندىرۋ جۇمىستارى جوعارى ءورت جۇكتەمەسى مەن قويۋ تۇتىنگە بايلانىستى كۇردەلەنىپ وتىر. قازىرگى ۋاقىتتا ءورتتى اۋىزدىقتاۋ ءۇشىن پەريمەتر بويىنشا سۋ شاشىراتقىشتار ورناتىلىپ، بيىك تەحنيكالاردىڭ كومەگىمەن سۋ بەرۋ جۇمىستارى جۇرگىزىلۋدە.
وقيعا ورنىندا جەدەل شتاب قۇرىلىپ، سۋدىڭ ۇزدىكسىز بەرىلۋى قامتاماسىز ەتىلگەن. ءورتتىڭ شىعۋ سەبەپتەرى انىقتالىپ جاتىر.
