بۇگىن وبلىس اكىمى ماحامبەت دوسمۇحامبەتوۆتىڭ توراعالىعىمەن وتكەن كەڭەستە وڭىردەگى ەپيدەميولوگيالىق احۋال مەن ۆاكتسينالاۋ جۇمىستارىنىڭ بارىسى قارالدى.
اتىراۋ وبلىسى بويىنشا سانيتارلىق – ەپيدەميولوگيالىق باقىلاۋ دەپارتامەنتىنىڭ باسشىسى مادەنيەت تاناۋوۆ قاڭتار – ماۋسىم ايلارىندا كوروناۆيرۋس ينفەكتسياسىن جۇقتىرعانداردىڭ تاۋلىكتىك كورسەتكىشى 87 ادام بولسا، شىلدەدە بۇل كورسەتكىش 150-گە جەتكەنىن مالىمدەدى. ونىڭ سوزىنشە، وسى ايدا كوروناۆيرۋس ينفەكتسياسى انىقتالعانداردىڭ 53 پايىزى قاتەرلى دەرتتى توي-تومالاق، ەسكە الۋ ءىس-شارالارى، ساۋدا ۇيلەرى، بازارلار، قوعامدىق تاماقتانۋ ورىندارى مەن تۇنگى كلۋبتاردان جۇقتىرعان. ال قالعان 25,9% ناۋقاسپەن جاقىن قارىم – قاتىناستا بولعاندار، 11,7% قوعامدىق كولىكتەردە شالدىققان.
تۇرعىندار سانيتاريالىق ساقتىق شارالارىنا نەمقۇرايلى قاراي باستاعان. بەتپەردە تاقپاۋ مەن الەۋمەتتىك ديستانتسيانى ساقتاماۋ دا ەپيدەميولوگيالىق احۋالعا كەرى اسەر ەتۋدە. «اۋرۋدىڭ ءوسۋىنىڭ تاعى ءبىر سەبەبى – جاڭا شتاممنىڭ تارالۋى. الماتىعا جىبەرىلگەن 43 سىنامانىڭ 18-نەن «دەلتا» شتاممى انىقتالدى. ونىڭ جۇعۋ دەڭگەيى ەكى ەسە جوعارى جانە ونىمەن اۋرۋ بارىسى اۋىر فورمادا وتەدى»،- دەدى مادەنيەت تاناۋوۆ.
ەپيدەميولوگيالىق احۋالدىڭ تۇراقسىزدىعىن قاتاڭ ەسكەرتكەن ءوڭىر باسشىسى ماحامبەت دوسمۇحامبەتوۆ اسىرەسە، دەنساۋلىق ساقتاۋ باسقارماسى باسشىلىعىنا كەز كەلگەن جاعدايعا دايىن بولۋ كەرەكتىگىن تاپسىردى.
وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى قايسار ابدۋاليەۆتىڭ ايتۋىنشا، كوروناۆيرۋس جۇقتىرعانداردىڭ وسۋىنە بايلانىستى سوڭعى ءبىر اپتادا اتىراۋ قالاسىندا رەزەرۆتەن 330 ينفەكتسيالىق توسەك ورىن ىسكە قوسىلعان. «اۋىرعاندار سانى ءوسىپ جاتسا №2 وبلىستىق اۋرۋحاناداعى 30 ورىندىق ىشەك ينفەكتسياسى ءبولىمىن باسقا جەرگە اۋىستىرىپ، ينفەكتسيالىق ستاتسيونارعا اينالدىرامىز. وبلىستىق اۋرۋحانانىڭ جاڭا كورپۋسىنان 200 ورىن دايىنداپ وتىرمىز، جاعداي ۋشىعىپ جاتسا ونى تۇگەلدەي ينفەكتسيالىق ستاتسيونار قىلامىز. سونداي-اق، تەمىر جول اۋرۋحاناسىنان دا ورىندار دايىندايمىز»،-دەدى ق.ابدۋاليەۆ.
ول سونداي-اق حالىقتى ۆاكتسينالاۋ جۇمىستارىن دا باياندادى. بۇگىنگە دەيىن وڭىرگە 141 200 دوزا ۆاكتسينا جەتكىزىلگەن. 2021 جىلدىڭ 1-ءشى اقپانى مەن 7-شىلدەسى ارالىعىندا ەكپە سالدىرعان ادامدار سانى 104 722-گە جەتكەن.
باسىم ۆاكتسينالاۋعا جاتاتىن كونتينگەنتتەر اراسىندا ەڭ جوعارعى كورسەتكىشتى اسكەري بولىمدەردىڭ ساربازدارىن قوسا العاندا قۇقىق قورعاۋ ورگاندارىنىڭ قىزمەتكەرلەرى كورسەتىپ وتىر – 163%.
ال، ەڭ تومەنگى كورسەتكىش سوزىلمالى اۋرۋلارى بار ناۋقاستار – 11%، ستۋدەنتتەر – 11,4%، جانە پەداگوگتار – 50% اراسىندا بايقالادى.
قايسار ابدۋاليەۆتىڭ سوزىنشە، حالىقتىڭ ۆاكتسينامەن قامتىلۋىن ارتتىرۋ ءۇشىن ءتۇرلى ىنتالاندىرۋ ءىس-شارالارى قولعا الىنعان.
بۇدان بولەك، ءوڭىر باسشىسى ۆاكتسينالاۋ جۇمىستارى بويىنشا اۋدانداردىڭ اكىمدەرى مەن وقۋ ورىندارىنىڭ باسشىلارىن دا تىڭدادى.
جيىن سوڭىندا وبلىس اكىمى ءتيىستى سالالار باسشىلارىنا وڭىردەگى ەپيدەميولوگيالىق احۋالدى كۇندەلىكتى باقىلاۋدا ۇستاۋدى تاپسىردى. سونىمەن قاتار، حالىقتى جاپپاي ۆاكتسينالاۋ جۇمىستارىن كۇشەيتۋدى، مونيتورينگتىك توپتاردىڭ قىزمەتى مەن اقپاراتتىق – ءتۇسىندىرۋ جۇمىستارىن جانداندىرۋدى جۇكتەدى.
جيىنعا وبلىس اكىمىنىڭ ورىنباسارلارى، باسقارمالار مەن جوعارى وقۋ ورىندارىنىڭ باسشىلارى جانە سەلەكتورلىق رەجيمدە اۋدان اكىمدەرى قاتىستى.
