اتىراۋ وبلىسىنىڭ اكىمى ماحامبەت دوسمۇحامبەتوۆ ۇلتتىق دومبىرا كۇنى قارساڭىندا كۇي اتاسى اتانعان داۋلەسكەر كۇيشى قۇرمانعازى ساعىربايۇلىنىڭ ەسكەرتكىشىنە گۇل شوقتارىن قويدى.
ۇلتتىق دومبىرا كۇنىنە ارنالىپ قۇرمانعازى ەسكەرتكىشى الاڭىندا وتكەن ءىس-شاراعا ايماق باسشىسىمەن بىرگە ءوڭىردىڭ زيالىلارى مەن قوعام قايراتكەرلەرى سونداي-اق ونەر سالاسى ارداگەرلەرى قاتىستى.
وبلىس اكىمى ماحامبەت دوسمۇحامبەتوۆ تاۋەلسىزدىك جىلدارى ۇلتتىق قۇندىلىقتاردىڭ ۇلىقتالۋىنا ەرەكشە كوڭىل ءبولىنىپ كەلە جاتقانىنا توقتالدى. ونىڭ سوزىنشە، دومبىرا كۇنىنىڭ مەرەكەلەر كۇنتىزبەسىنە ەنۋى — ۇلتتىق رۋحانياتقا سونى سەرپىن بەرگەن.
«دومبىرا – ۇلتتىڭ ءۇنى مەن جانى عانا ەمەس، مىڭداعان جىلدار بويى حالقىمىزبەن بىرگە جاساپ كەلە جاتقان قاستەرلى قاسيەتى. باعزى بابالاردان جەتكەن باستى بايلىعىمىز. سوندىقتان دومبىراسىز ۇلت مادەنيەتى تاريحىن كوز الدىمىزعا ەلەستەتۋ مۇمكىن ەمەس. ءاربىر شاڭىراقتىڭ تورىندە تۇرۋى ءتيىس ايرىقشا اسپابىمىزدى ۇلىقتاۋ ارقىلى ۇلتتىق بولمىسىمىزدى كۇشەيتە تۇسەمىز»،-دەدى وبلىس باسشىسى.
سونداي-اق ول ۇلتتىق مەرەكە كۇنىن ەل اعالارىمەن بىرگە ۇلى كۇيشى قۇرمانعازىنىڭ ەسكەرتكىشىنە كەلىپ، تاعزىم ەتۋمەن باستاۋدىڭ وزىندىك سەبەبىنە توقتالدى. «اتىراۋ – ەجەلدەن كۇي ەلى. عاسىردان عاسىرعا جەتكەن باتىستىڭ كۇيشىلىك ونەرى – تاريحىنىڭ تامىرى تەرەڭدە. كيەلى توپىراقتان قۇرمانعازى، داۋلەتكەرەي، دينا، ەسباي مەن بالامايسان، قارشىعا مەن رىسباي، ءازيدوللا اعالارىمىز بەن قازاق كۇيىنىڭ قازىرگى ماقتانىشى ايگۇل شىققان. سوندىقتان اتىراۋدىڭ كۇيشىلىك ونەرى ۇلتتىق مادەنيەتتىڭ كۇرە تامىرلارىنىڭ ءبىرى»،-دەدى.
ءوز كەزەگىندە قازاقستاننىڭ جانە قىرعىزستاننىڭ ەڭبەك سىڭىرگەن قايراتكەرى، بەلگىلى كومپوزيتور يليا جاقانوۆ ۇلتتىق ونەردەگى دومبىرانىڭ ءرولى، اتىراۋ كۇيشىلىك مەكتەبى تۋرالى جان-جاقتى اتاپ ءوتتى.
ءىس-شارا اياسىندا جۇرتشىلىق نازارىنا «نارىن» ۇلت-اسپاپتار وركەسترى بىرنەشە كۇي ۇسىندى.
