Atyraý oblysynyń ákimi Mahambet Dosmuhambetov Ulttyq dombyra kúni qarsańynda kúı atasy atanǵan dáýlesker kúıshi Qurmanǵazy Saǵyrbaıulynyń eskertkishine gúl shoqtaryn qoıdy.
Ulttyq dombyra kúnine arnalyp Qurmanǵazy eskertkishi alańynda ótken is-sharaǵa aımaq basshysymen birge óńirdiń zııalylary men qoǵam qaıratkerleri sondaı-aq óner salasy ardagerleri qatysty.
Oblys ákimi Mahambet Dosmuhambetov Táýelsizdik jyldary ulttyq qundylyqtardyń ulyqtalýyna erekshe kóńil bólinip kele jatqanyna toqtaldy. Onyń sózinshe, dombyra kúniniń merekeler kúntizbesine enýi — ulttyq rýhanııatqa sony serpin bergen.
«Dombyra – ulttyń úni men jany ǵana emes, myńdaǵan jyldar boıy halqymyzben birge jasap kele jatqan qasterli qasıeti. Baǵzy babalardan jetken basty baılyǵymyz. Sondyqtan dombyrasyz ult mádenıeti tarıhyn kóz aldymyzǵa elestetý múmkin emes. Árbir shańyraqtyń tórinde turýy tıis aıryqsha aspabymyzdy ulyqtaý arqyly ulttyq bolmysymyzdy kúsheıte túsemiz»,-dedi oblys basshysy.
Sondaı-aq ol ulttyq mereke kúnin el aǵalarymen birge uly kúıshi Qurmanǵazynyń eskertkishine kelip, taǵzym etýmen bastaýdyń ózindik sebebine toqtaldy. «Atyraý – ejelden kúı eli. Ǵasyrdan ǵasyrǵa jetken batystyń kúıshilik óneri – tarıhynyń tamyry tereńde. Kıeli topyraqtan Qurmanǵazy, Dáýletkereı, Dına, Esbaı men Balamaısan, Qarshyǵa men Rysbaı, Ázıdolla aǵalarymyz ben qazaq kúıiniń qazirgi maqtanyshy Aıgúl shyqqan. Sondyqtan Atyraýdyń kúıshilik óneri ulttyq mádenıettiń kúre tamyrlarynyń biri»,-dedi.
Óz kezeginde Qazaqstannyń jáne Qyrǵyzstannyń eńbek sińirgen qaıratkeri, belgili kompozıtor Ilıa Jaqanov ulttyq ónerdegi dombyranyń róli, Atyraý kúıshilik mektebi týraly jan-jaqty atap ótti.
Is-shara aıasynda jurtshylyq nazaryna «Naryn» ult-aspaptar orkestri birneshe kúı usyndy.
