توكيو وليمپياداسى جانكۇيەرلەردىڭ ەسىندە سوڭعى ساتكە دەيىن مەدال كۇتۋ، ەڭ قىمباتقا (7,5 ملن دوللار)ساتىپ العان دودادا وتاندىق سپورتشىلاردىڭ ونەرىن وزبەك، ۋكراين كانالدارىنان ىزدەپ كورۋمەن ەستە قالدى.
جازعى وليمپيادانى قاي ورىندا اياقتاعانبىز؟
اتلانتا وليمپياداسى — 24-ورىن ( 3 التىن، 4 كۇمىس، 4 قولا)
سيدنەي وليمپياداسى — 22-ورىن ( 3 التىن، 4 كۇمىس)
افينا وليمپياداسى — 40-ورىن ( 1 التىن، 4 كۇمىس، 3 قولا)
بەيجىڭ وليمپياداسى — 29-ورىن ( 2 التىن، 4 كۇمىس، 7 قولا)
لوندون وليمپياداسى — 24-ورىن ( 3 التىن، 1 كۇمىس، 6 قولا)
ريو وليمپياداسى — 22-ورىن ( 3 التىن، 5 كۇمىس، 10 قولا)
توكيو وليمپياداسى — ازىرگە 83-ورىن ( 8 قولا)
توكيودا قولا جۇلدەنى كىمدەر الدى؟
ەلدوس سمەتوۆ (28 جاستا، 60 كەلى) - دزيۋدو.
يگور سون (دەبيۋتانت، 22 جاستا، 61 كەلى) - اۋىر اتلەتيكا.
ءزۇلفيا چينشانلو (28 جاستا، 55 كەلى) - اۋىر اتلەتيكا.
قامشىبەك قوڭقاباەۆ (دەبيۋتانت، 29 جاستا، 91+ كەلى) - بوكس.
ساكەن بيبوسىنوۆ (دەبيۋتانت، 24 جاستا، 52 كەلى) - بوكس.
نۇريسلام ساناەۆ (30 جاستا، 61 كەلى) - ەركىن كۇرەس.
دارحان ءاسادىلوۆ (دەبيۋتانت، 33 جاستا، 67 كەلى) - كاراتە.
سوفيا بەرۋلتسەۆا (دەبيۋتانت، 20 جاستا، 62 كەلى) - كاراتە.
تەك قولا العانىمىزدى دا ازىلگە اينالدىرىپ، ساركازمدىق نەگىزدە جازىپ جاتقان قجەلى قولدانۋشىلارى جەتەرلىك. مىسالى بازاربەك قامىسباەۆ (فەيسبۋك قولدانۋشىسى): "توكيو وليمپياداسىنىڭ ءبىر ارتىقشىلىعى، "قولا" العانداردىڭ ەسىمىن جاتتاپ الاتىن بولدىق. ريو وليمپياداسىندا 10 "قولا" جۇلدەنى العان سپورتشىنى اتاپ بەرە الاسىز با؟" دەگەن وي قالدىرىپتى.
بۇل وليمپيادا "سان ۇنەمى ساپاعا ۇلاسپايتىنىن" كورسەتتى.. سيدنەي وليمپياداسىندا ەڭ از 7 جۇلدە الساق تا، "ەڭ ءساتتى وليمپيادا" رەتىندە ءالى كۇنگە اتالىپ كەلەدى. ال توكيو وليمپياداسىندا 8 قولا جۇلدە الىپ، تاريحىمىزداعى انتيرەكوردتى (جالپى ەسەپتەگى ورىن) جاڭارتتىق.
ورتالىق ازيا ەلدەرىمەن سالىستىرساق
| مەملەكەت | 1996 جىل | 2000 جىل | 2004 جىل | 2008 جىل | 2012 جىل | 2016 جىل | 2020 جىل |
| قازاقستان | 24-ورىن | 22-ورىن | 40-ورىن | 29-ورىن | 25-ورىن | 22-ورىن | 83-ورىن |
| وزبەكستان | 58-ورىن | 43-ورىن | 35-ورىن | 40-ورىن | 48-ورىن | 21-ورىن | 32-ورىن |
| قىرعىزستان | جۇلدە الماعان | 71-ورىن | جۇلدە الماعان | 65-ورىن | جۇلدە الماعان | جۇلدە الماعان | 70-ورىن |
| تاجىكستان | جۇلدە الماعان | جۇلدە الماعان | جۇلدە الماعان | 65-ورىن | 79-ورىن | 54-ورىن | جۇلدە الماعان |
| تۇركىمەنستان | جۇلدە الماعان | جۇلدە الماعان | جۇلدە الماعان | جۇلدە الماعان | جۇلدە الماعان | جۇلدە الماعان | 77-ورىن |
توكيو وليمپياداسىنا جالپى ورتالىق ازيادان قاتىسقان سپورتشىلار سانى مەن جۇلدەسى بىلاي بولدى:
- قازاقستان العاش رەت "قولا" جۇلدەمەن شەكتەلدى. (93 سپورتشى)
- قىرعىزستان ءوز تاريحىندا العاش رەت 2 "كۇمىس" الدى. (16 سپورتشى)
- تۇركىمەنستان العاش رەت وليمپيادانىڭ جۇلدەسىنە (اۋىر اتلەتيكادان "كۇمىس" جۇلدە) قول جەتكىزدى. (9 سپورتشى)
- وزبەكستان 2 وليمپيادا قاتارىنان ورتالىق ازيادا كوشباسشى اتاندى. (67 سپورتشى)
- تاجىكستان (10 سپورتشى)
قانداي ەرەكشەلىكتەر بايقالدى؟
- ۇلكەن تەننيستە العاش رەت جارتىلاي فينالعا جەتتىك. (22 جاستاعى ەلەنا رىباكينا قازاقستاننىڭ رەكوردىن جاڭارتتى. بۇعان دەيىنگى ۇزدىك كورسەتكىش: 2012 جىلى ياروسلاۆا شۆەدوۆا 1/16 فينالعا جەتكەن).
- وليمپياداداعى جاڭا سپورت تۇرىنەن جۇلدە الدىق. (كاراتەدەن 2 سپورتشىمىز قولا جۇلدەگەر اتاندى. وكىنىشكە قاراي، 2024 جىلى پاريج وليمپياداسىنا كاراتە ەنگىزىلمەيدى.)
- العاش رەت سوڭعى جۇلدەنى بوكسشىلار المادى (سپورت سۇيەر كورەرمەندەر كاراتەشى سوفيا بەرۋلتسەۆانىڭ تىلەۋىن تىلەدى)
- بوكستان العاش رەت "قازاق سالماعىندا" جۇلدە المادىق (69 كەلى سالماقتا قازاق بوكسشىلارى 2004 جىلدان بەرى چەمپيون اتانىپ كەلگەن).
- اۋىر اتلەتيكادان بارعان 2 سپورتشىمىز دا جۇلدە الدى.
- 2-ءشى مارتە قاتارىنان العاشقى وليمپيادا جۇلدەسىن دزيۋدوشىلارىمىز (ەلدوس سمەتوۆ) اپەردى. (2016 جىلى گالبادراح وتگونتسەتسەگ)
بوكستاعى انتيرەكوردتى قايتالادىق
اتلانتا (1996) - 1 التىن، 1 كۇمىس جانە 2 قولا.
سيدنەي (2000) - 2 التىن، 2 كۇمىس.
افينا (2004) - 1 التىن، 1 كۇمىس جانە 1 قولا.
بەيجىڭ (2008) - 1 التىن، 1 قولا.
لوندون (2012) - 1 التىن، 1 كۇمىس جانە 2 قولا.
ريو (2016) - 1 التىن، 2 كۇمىس جانە 2 قولا.
توكيو (2020) — 2 قولا.
وڭ جامباسىمىزعا كەلەتىن بوكستان العاش رەت "التىن" جۇلدەسىز قالۋىمىز كوپشىلىكتى الاڭداتقانى انىق. بىراق پاريج وليمپياداسىندا ەرلەر باسەكەسىندە تاعى دا سالماقتىڭ ازاياتىندىعىن ەسكەرگەندىگىڭىز ءجون.
اتلانتا (1996) - ەرلەر باسەكەسى - 12
سيدنەي (2000) - ەرلەر باسەكەسى - 12
افينا (2004) - ەرلەر باسەكەسى - 11
بەيجىڭ (2008) - ەرلەر باسەكەسى - 11
لوندون (2012) - ەرلەر باسەكەسى - 10, قىزدار باسەكەسى - 3.
ريو (2016) - ەرلەر باسەكەسى - 10, قىزدار باسەكەسى - 3
توكيو (2020) - ەرلەر باسەكەسى - 8, قىزدار باسەكەسى - 5
پاريج (2024) - ەرلەر باسەكەسى - 7, قىزدار باسەكەسى - 6
وكىنىشكە قاراي، جازعى وليمپيادادا تاعى دا ءباسىمىز جوعارى كۇرەس، بوكس، اۋىر اتلەتيكادان عانا جۇلدە الدىق. ەگەر توكيو وليمپياداسىنداعى 4 ەسە قۇلدىراعان تەرىس ناتيجەمىز پاريج تورىندە قايتالانباسىن دەسەك، باسقا سپورتتارعا دا نازارىمىزدى اۋدارعان دۇرىس.
بىزدە سپورتتان جۇلدە السا عانا، سول سپورتتى دامىتۋعا كوڭىل بولەدى. ال وزگە ەلدەر سپورتتى دامىتىپ، ودان كەيىن جۇلدە الۋدى ماقسات ەتەدى.
قانات بايۇزاقوۆ
"ادىرنا" ۇلتتىق پورتالى
