Tokıo Olımpıadasy jankúıerlerdiń esinde sońǵy sátke deıin medal kútý, eń qymbatqa (7,5 mln dollar)satyp alǵan dodada otandyq sportshylardyń ónerin ózbek, ýkraın kanaldarynan izdep kórýmen este qaldy.
Jazǵy olımpıadany qaı orynda aıaqtaǵanbyz?
Atlanta Olımpıadasy — 24-oryn ( 3 altyn, 4 kúmis, 4 qola)
Sıdneı Olımpıadasy — 22-oryn ( 3 altyn, 4 kúmis)
Afına Olımpıadasy — 40-oryn ( 1 altyn, 4 kúmis, 3 qola)
Beıjiń Olımpıadasy — 29-oryn ( 2 altyn, 4 kúmis, 7 qola)
London Olımpıadasy — 24-oryn ( 3 altyn, 1 kúmis, 6 qola)
Rıo Olımpıadasy — 22-oryn ( 3 altyn, 5 kúmis, 10 qola)
Tokıo Olımpıadasy — ázirge 83-oryn ( 8 qola)
Tokıoda qola júldeni kimder aldy?
Eldos Smetov (28 jasta, 60 keli) - dzıýdo.
Igor Son (debıýtant, 22 jasta, 61 keli) - aýyr atletıka.
Zúlfııa Chınshanlo (28 jasta, 55 keli) - aýyr atletıka.
Qamshybek Qońqabaev (debıýtant, 29 jasta, 91+ keli) - boks.
Sáken Bıbosynov (debıýtant, 24 jasta, 52 keli) - boks.
Nurıslam Sanaev (30 jasta, 61 keli) - erkin kúres.
Darhan Asadilov (debıýtant, 33 jasta, 67 keli) - karate.
Sofıa Berýleva (debıýtant, 20 jasta, 62 keli) - karate.
Tek qola alǵanymyzdy da ázilge aınaldyryp, sarkazmdyq negizde jazyp jatqan qjeli qoldanýshylary jeterlik. Mysaly Bazarbek Qamysbaev (Feısbýk qoldanýshysy): "Tokıo Olımpıadasynyń bir artyqshylyǵy, "qola" alǵandardyń esimin jattap alatyn boldyq. Rıo Olımpıadasynda 10 "qola" júldeni alǵan sportshyny atap bere alasyz ba?" degen oı qaldyrypty.
Bul olımpıada "san únemi sapaǵa ulaspaıtynyn" kórsetti.. Sıdneı Olımpıadasynda eń az 7 júlde alsaq ta, "eń sátti Olımpıada" retinde áli kúnge atalyp keledi. Al Tokıo Olımpıadasynda 8 qola júlde alyp, tarıhymyzdaǵy antırekordty (jalpy eseptegi oryn) jańarttyq.
Ortalyq Azııa elderimen salystyrsaq
| Memleket | 1996 jyl | 2000 jyl | 2004 jyl | 2008 jyl | 2012 jyl | 2016 jyl | 2020 jyl |
| Qazaqstan | 24-oryn | 22-oryn | 40-oryn | 29-oryn | 25-oryn | 22-oryn | 83-oryn |
| Ózbekstan | 58-oryn | 43-oryn | 35-oryn | 40-oryn | 48-oryn | 21-oryn | 32-oryn |
| Qyrǵyzstan | Júlde almaǵan | 71-oryn | Júlde almaǵan | 65-oryn | Júlde almaǵan | Júlde almaǵan | 70-oryn |
| Tájikstan | Júlde almaǵan | Júlde almaǵan | Júlde almaǵan | 65-oryn | 79-oryn | 54-oryn | Júlde almaǵan |
| Túrkimenstan | Júlde almaǵan | Júlde almaǵan | Júlde almaǵan | Júlde almaǵan | Júlde almaǵan | Júlde almaǵan | 77-oryn |
Tokıo olımpıadasyna jalpy Ortalyq Azııadan qatysqan sportshylar sany men júldesi bylaı boldy:
- Qazaqstan alǵash ret "qola" júldemen shekteldi. (93 sportshy)
- Qyrǵyzstan óz tarıhynda alǵash ret 2 "kúmis" aldy. (16 sportshy)
- Túrkimenstan alǵash ret Olımpıadanyń júldesine (aýyr atletıkadan "kúmis" júlde) qol jetkizdi. (9 sportshy)
- Ózbekstan 2 Olımpıada qatarynan Ortalyq Azııada kóshbasshy atandy. (67 sportshy)
- Tájikstan (10 sportshy)
Qandaı erekshelikter baıqaldy?
- Úlken tennıste alǵash ret jartylaı fınalǵa jettik. (22 jastaǵy Elena Rybakına Qazaqstannyń rekordyn jańartty. Buǵan deıingi úzdik kórsetkish: 2012 jyly Iaroslava Shvedova 1/16 fınalǵa jetken).
- Olımpıadadaǵy jańa sport túrinen júlde aldyq. (Karateden 2 sportshymyz qola júldeger atandy. Ókinishke qaraı, 2024 jyly Parıj Olımpıadasyna karate engizilmeıdi.)
- Alǵash ret sońǵy júldeni boksshylar almady (Sport súıer kórermender karateshi Sofıa Berýlevanyń tileýin tiledi)
- Bokstan alǵash ret "qazaq salmaǵynda" júlde almadyq (69 keli salmaqta qazaq boksshylary 2004 jyldan beri chempıon atanyp kelgen).
- Aýyr atletıkadan barǵan 2 sportshymyz da júlde aldy.
- 2-shi márte qatarynan alǵashqy Olımpıada júldesin dzıýdoshylarymyz (Eldos Smetov) áperdi. (2016 jyly Galbadrah Otgoneeg)
Bokstaǵy antırekordty qaıtaladyq
Atlanta (1996) - 1 altyn, 1 kúmis jáne 2 qola.
Sıdneı (2000) - 2 altyn, 2 kúmis.
Afına (2004) - 1 altyn, 1 kúmis jáne 1 qola.
Beıjiń (2008) - 1 altyn, 1 qola.
London (2012) - 1 altyn, 1 kúmis jáne 2 qola.
Rıo (2016) - 1 altyn, 2 kúmis jáne 2 qola.
Tokıo (2020) — 2 qola.
Oń jambasymyzǵa keletin bokstan alǵash ret "altyn" júldesiz qalýymyz kópshilikti alańdatqany anyq. Biraq Parıj Olımpıadasynda erler básekesinde taǵy da salmaqtyń azaıatyndyǵyn eskergendigińiz jón.
Atlanta (1996) - Erler básekesi - 12
Sıdneı (2000) - Erler básekesi - 12
Afına (2004) - Erler básekesi - 11
Beıjiń (2008) - Erler básekesi - 11
London (2012) - Erler básekesi - 10, qyzdar básekesi - 3.
Rıo (2016) - Erler básekesi - 10, qyzdar básekesi - 3
Tokıo (2020) - Erler básekesi - 8, qyzdar básekesi - 5
Parıj (2024) - Erler básekesi - 7, qyzdar básekesi - 6
Ókinishke qaraı, Jazǵy Olımpıadada taǵy da básimiz joǵary kúres, boks, aýyr atletıkadan ǵana júlde aldyq. Eger Tokıo Olımpıadasyndaǵy 4 ese quldyraǵan teris nátıjemiz Parıj tórinde qaıtalanbasyn desek, basqa sporttarǵa da nazarymyzdy aýdarǵan durys.
Bizde sporttan júlde alsa ǵana, sol sportty damytýǵa kóńil bóledi. Al ózge elder sportty damytyp, odan keıin júlde alýdy maqsat etedi.
Qanat Baıuzaqov
"Adyrna" ulttyq portaly
