بيىل كۇز ايلارىندا 12-18 جاس ارالىعىنداعى بالالارعا «Pfizer» ۆاكتسيناسى سالىنۋى مۇمكىن دەپ حابارلايدى "ادىرنا" ۇلتتىق پورتالى "ەۋرازيا" ارناسىنا سىلتەمە جاساپ.
بۇل تۋرالى مالىمدەمە جاساعان سانيتارلىق-ەپيدەميولوگيالىق باقىلاۋ كوميتەتىنىڭ توراعاسى ايجان ەسماعامبەتوۆا دەنساۋلىق ساقتاۋ مينيسترلىگى وسى پرەپاراتتى ەلگە جەتكىزۋ ءۇشىن قازىر كەلىسسوزدەر جۇرگىزىپ جاتقانىن ايتتى.
قازاقستاندىقتار ءۇشىن بۇل پرەپارات قازان ايىندا قولجەتىمدى بولۋى ءتيىس. قازىر ەلدە دەلتا شتامىنىڭ ورشۋىنە بايلانىستى دەرت بالالار اراسىندا دەندەپ جاتقانىن ايتىپ، دارىگەرلەر دابىل قاعۋدا. سول ءۇشىن اتا-اناسىنىڭ رۇقساتىمەن، ەكپە 12 جاستان اسقان جەتكىنشەكتەرگە سالىنۋى مۇمكىن.
"بۇل الەم تاجىريبەدە بار" دەگەن ۆەدومستۆو وكىلىنىڭ سوزىنشە، بۇگىندە دەيىن الەم ەلدەرىندە «Pfizer» ۆاكتسيناسىن قابىلداعان بالالاردا ەشقانداي جاناما اسەر بايقالماپتى. ودان بولەك، باس قالادا وتكەن بريفينگتە جاڭادان شىققان تاعى ءبىر ۆاكتسينا جايى قوزعالدى. كۇنى كەشە رەسەيدە رەسمي تىركەۋدەن وتكەن ءبىر كومپونەنتتى «سپۋتنيك لايت» ەكپەسىن دە جاقىن ۋاقىتتا ەل اۋماعىنا جەتكىزۋ ماسەلەسى قاراستىرىلىپ جاتىر ەكەن.
«بۇل ۆاكتسينانىڭ تيىمدىلىگى 80 پايىزدى قۇرايدى. ەڭ باستىسى، ءبىر دوزالى. كەي ازاماتتار ەكى دوزاسىن سالعىسى كەلمەسە، وسى "سپۋتنيك لايتتى" سالعىزسا بولادى. ەلگە اكەلۋ ماسەلەسىنە بايانىستى قازىر كەلىسسوزدەر جۇرگىزىلىپ جاتىر»، — دەيدى سانيتارلىق-ەپيدەميولوگيالىق باقىلاۋ كوميتەتىنىڭ رەسي وكىلى ەرجان بايتاناەۆ.
"سپۋتنيك لايت" ەكپەسىن وندىرگەن عالىمداردىڭ دەرەگىنشە، بۇل ۆاكتسينانىڭ ايتارلىقتاي كەرى اسەرى جوق. تەك ەكپە سالىنعان ورىننىڭ اۋىرسىنۋى بايقالىپ، سيرەك جاعدايدا دەنە قىزۋى كوتەرىلۋى مۇمكىن.
ايتا كەتۋ كەرەك، بۇگىنگە دەيىن ەلىمىزدە ەكپەنىڭ قوس كومپونەنتىن 2 ملن 700 مىڭ قازاقستاندىق قابىلداعان. 11 مىڭ وتانداسىمىز مەديتسينالىق قارسى كورسەتىلىمىنە سايكەس، ۆاكتسينا سالدىرۋدان بوساتىلعان.
تاعى ءبىر جايت، مينيسترلىك وكىلدەرىنىڭ ايتۋىنشا، بيىلعى جىلدىڭ 10 تامىزىنا دەيىن ەكپەنىڭ ءبىر كومپونەنتىن الىپ ۇلگەرمەگەن قىزمەتكەرلەردى جۇمىس بەرۋشى قىزمەتىنەن شەتتەتۋگە قۇقىلى.
"ادىرنا" ۇلتتىق پورتالى.
