Koronavırýstan qaıtys bolǵandar elde úsh-tórt esege kóbeıdi. Dárigerlerdi ásirese naýqastardyń tym "jasaryp" bara jatqany alańdatyp otyr, dep habarlady KTK.
Óıtkeni marqumdardyń arasynda qazir qyryqqa da tolmaǵan jastar kóp. Indetke qarsy turýdyń jalǵyz amaly – vakına. Muny dárigerler kúnde aıtýdan jalyqqan emes.
Almatydaǵy máıithananyń ishine kirgen jýrnalıster koronavırýstan kóz jumǵandardy jerleý rásimi qalaı atqarylyp jatqanyn kórdi.
Dálizde óli tynyshtyq. Óıtkeni dárigerlerdiń barlyǵy máıittermen jumys istep jatyr.
Patologoanatom Azamat Beısenovtiń máıithanada koronavırýstyń marqumnyń aǵzasyna qalaı juǵyp, qalaı taraǵanyn anyqtaıdy. Atap aıtqanda, jasyl qutylardy tekseredi. Onda indetten ólgen adamdardyń júrek, ókpe, baýyr-búıeginiń bólshekteri jatyr. Olar endi qaýipsiz. Óıtkeni zalalsyzdandyrylǵan.
"Koronavırýstan qaıtys bolyp jatqan adamdar "jasaryp" bara jatyr. Sonyń ózi deneńdi túrshiktiretin jaǵdaı. Ashyp qaraǵanda, birinshi ókpesindegi ózgeristi kóremiz. Aýaǵa tolyp turatyn ókpe qataıyp qalady. Bizge jany qınalyp ólgen adamdar keledi", - deıdi Azamat Beısenov.
Sońǵy aıdaǵy jaǵdaı Ashat Qostaevty da shoshyndyrǵan. Kór qazatyn jigit zırattyń jastarǵa tolǵanyn aıtady. Kúndiz ǵana emes, túnde de qoldan kúrek túspeıtin boldy deıdi.
"Úlgermeı qalatyn kezder de bolady. Qazir ortasha eseppen kúnine kovıdten kóz jumǵan 4-5 adamdy jerlep jatyrmyz. Qabirdiń ishi hlorlanady. Vakınany ózimiz úshin saldyrdyq. Óıtkeni kóbinese indetten qaıtys bolǵan kisiler jerlenedi", - deıdi kór qazýshy Ashat Qostaev.
Týǵan-týystyń kóz jasyna kúnde kýá máıithana basshysy halyqty jappaı ekpe saldyrýǵa shaqyrdy.
"Adamdar vakına saldyrmaı jatyr. Men onymen kelispeımin. Sebebi ekpeniń qorǵanysh áseri dáleldengen. Mysaly, bizdiń mekemede 120 qyzmetker jumys isteıdi. 100 paıyz ekpe saldyrdy. Biz koronavırýstan qaıtys bolǵan máıitterdi soıamyz. Bizde juqtyrý qaýpi óte joǵary. Biraq soǵan qaramastan, birde-bir qyzmetker aýyrǵan joq. Sondyqtan halyqty keıinge qaldyrmaı, ekpe saldyrýǵa shaqyramyn", - deıdi Almaty qalasy patologoanatomııalyq bıýro dırektorynyń mindetin atqarýshy Erjan Quttyǵojın.
Al ólim-jitimniń kóbeıýine qarapaıym saqtyq sharalarynyń saqtalmaýy sebep. Kópshilik tyıymǵa qaramastan toı-sadaqaǵa barady. Aýrýdyń dál sol kópshilik jerde juǵyp jatqanyn belgili vırýsolog Janaı Aqanov ta aıtyp otyr.
"Kóbine sanıtarlyq talaptardyń saqtalmaýy sebep. Eshkimniń betperde kıgisi joq. Toı-tomalaq ta ótip jatyr. Oǵan qosa vakınaǵa qarsy shyǵýshylar kóbeıdi. Ásirese ońtústik aımaqta órship tur. Olar dárigerlerdiń jumysyn odan saıyn qıyndatyp jatyr. Óıtkeni jańa naýqastar kún sanap kelip túsýde. Bulaı jalǵasa berse, tósek oryn da, dári de jetispeıdi", - deıdi ol.
Esiginen máıit úzilmegen mekeme basshysy kúsheıe túsken indet jas-kárini ajyratyp jatqan joq deıdi. Báriniń ólim sebebi bir – ottegi jetispeı tynysy tarylady.
