اتىراۋ وبلىسىنىڭ اكىمى ماحامبەت دوسمۇحامبەتوۆ ۆەنگريانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ميحاي گالوشفايدى قابىلدادى.
كەزدەسۋدە ءتۇرلى سالاداعى ەكىجاقتى ىنتىماقتاستىق پەن ينۆەستيتسيا تارتۋ سىندى ماسەلەلەر تالقىلاندى.
وبلىس اكىمى ماحامبەت دوسمۇحامبەتوۆ ۆەنگەرلىك كومپانيالاردىڭ اتىراۋ وڭىرىندە قىزمەت ەتۋدە باي تاجىريبەسى بار ەكەنىن، ولاردىڭ اسا ءىرى تەڭىز مۇناي كەن ورنىن يگەرۋ جۇمىستارىنىڭ باسى-قاسىندا بولعانىن اتاپ ءوتتى. ءوڭىر باسشىسى سونداي-اق ۆەنگەرلىك تاراپتى اتىراۋ ەكونوميكاسىنىڭ مول مۇمكىندىگىمەن تانىستىرىپ، مۇناي-گاز وندىرۋدەن بولەك، ونىڭ قۇرىلىمىن ءارتاراپتاندىرۋ باعىتىندا جاسالىپ جاتقان جۇمىستارعا جان-جاقتى توقتالدى.
«قازىر مۇناي حيمياسىن، اۋىل شارۋاشىلىعىن، بالىق شارۋشىلىعىن، وڭدەۋ ونەركاسىبى مەن ماشينا جاساۋعا باسىمدىق بەرىپ وتىرمىز. سوندىقتان اسىرەسە، وسىنداي سالالارعا ينۆەستيتسيا تارتۋعا مۇددەلىمىز. ەگەر بيزنەس وكىلدەرى وسىندا كەلىپ، ءتۇرلى جوبالارعا ينۆەستيتسيا سالۋعا ىنتالى بولسا، جان-جاقتى قولداۋ كورسەتەمىز»،-دەدى ايماق باسشىسى.
سونداي-اق، ول تاياۋدا قابىلدانعان وبلىستى دامىتۋدىڭ كەشەندى جوسپارى تۋرالى ايتىپ، ونىڭ بيزنەس ءۇشىن قانداي مۇمكىندىكتەر اشاتىنىن ءتۇسىندىردى. ماسەلەن، «ۇلتتىق يندۋستريالدىق مۇنايحيميا تەحنوپاركى» ەركىن ەكونوميكالىق ايماعىنىڭ ينۆەستيتسيالىق الەۋەتى مول. وندا قازاقستاننىڭ مۇناي حيمياسى سالاسىن دامىتۋعا تىڭ سەرپىن بەرەتىن بىرقاتار جوبا جۇزەگە اسىرىلۋدا. وسى ورايدا ءوڭىر باسشىسى ۆەنگەرلىك ينۆەستورلاردى وبلىس اۋماعىندا بىرلەسكەن جوبالاردى ىسكە اسىرۋعا شاقىردى.
ءوز كەزەگىندە توتەنشە جانە وكىلەتتى ەلشىسى ميحاي گالوشفاي دا ۆەنگريا مەن قازاقستاننىڭ ەكونوميكالىق بايلانىستار سالاسىنداعى الەۋەتى مول ەكەنىن ايتىپ، ولاردى جانداندىرۋ قاجەتتىگىن اتاپ ءوتتى. سونىڭ ىشىندە، ۆەنگەرلىك تاراپتىڭ ءبىلىم بەرۋ، مەديتسينالىق، ەكولوگيالىق جوبالارعا قاتىسۋعا قىزىعۋشىلىق تانىتاتىنىن اتاپ ءوتتى.
م.دوسمۇحامبەتوۆ پەن م.گالوشفاي ەكى ەلدىڭ ەجەلدەن قالىپتاسقان تاريحي بايلانىستارى مەن ورتاق مادەني قۇندىلىقتارى قوس مەملەكەت حالىقتارىن جاقىنداستىراتىن فاكتور ەكەنىن اتاپ ءوتتى.
