اتىراۋ وبلىسىنىڭ اكىمى ماحامبەت دوسمۇحامبەتوۆ جاپونيا استاناسى توكيودا وتەتىن جازعى وليمپيادا جانە پاراليمپيادا ويىندارىنا جولداما جەڭىپ العان اتىراۋلىق سپورتشىلار – دەنيز جانسەل، نۇرلان دومباەۆ پەن ەرجان سالىمگەرەەۆتى قابىلداپ، الداعى الاماندا اق جول تىلەدى.
سپورتشىلارمەن كەزدەسۋدە اتىراۋ وبلىسىنىڭ اكىمى سپورتتان الەمدىك الامانعا ليتسەنزيا الۋ مەن قاتىسۋدىڭ ءوزى ۇلكەن جەتىستىك ەكەنىن اتاپ ءوتتى.
«نۇرلان، ەرجان جانە جانسەلدى توكيو وليمپياداسىنا جولداما الۋلارىمەن شىن جۇرەكتەن قۇتتىقتايمىن! جالپى، تاۋەلسىزدىكتىڭ وتىز جىلىندا جەرلەستەرىمىز جازعى وليمپيادا ويىندارىنان ەكى مەدال ەنشىلەدى. 2008 جىلى پەكين وليمپياداسىندا تاەكۆوندوشى ارمان چيلمانوۆ قولا، ال 2016 جىلى ريو وليمپياداسىندا اۋىر اتلەتىمىز نيدجات راحيموۆ التىن الىپ، چەمپيون اتاندى. بۇل تەك اتىراۋ عانا ەمەس، قازاقستان ءۇشىن زور مارتەبە بولدى. سىزدەر دە سول جەڭىستى جولدى جالعاستىرىپ، جەڭىل بارىپ، اۋىر قايتاتىندارىڭىزعا سەنەمىن!»،-دەدى وبلىس باسشىسى ماحامبەت دوسمۇحامبەتوۆ.
سونىمەن قاتار، وبلىس اكىمى سپورتشىلارىمىزدىڭ بابى كەلىسىپ، باعى جانۋىندا باپكەرلەردىڭ دە ەڭبەگى زور ەكەنىنە توقتالىپ، ارنايى العىسىن ءبىلدىردى.
ءوز كەزەگىندە جولداما العان سپورتشىلار قۇرمەت پەن سەنىم بىلدىرگەنى ءۇشىن وبلىس باسشىسىنا ريزاشىلىقتارىن جەتكىزدى. الماتىدا دايىندالىپ جاتقان دەنيز جانسەل كارانتين تالاپتارىنا سايكەس كەلە الماي، كەزدەسۋگە ونلاين قاتىستى. نۇرلان دومباەۆتىڭ جەكە جاتتىقتىرۋشىسى اسان كاساەۆتىڭ ايتۋىنشا، سپورتشىلار وزدەرىنە ارتىلعان ۇكىلى ءۇمىتتى سوزبەن ەمەس، ىسپەن دالەلدەۋگە بارىن سالادى.
كەزدەسۋ سوڭىندا سپورتشىلار مەن ولاردىڭ باپكەرلەرىنە ايماق باسشىسىنىڭ العىس حاتى مەن قارجىلاي سەرتيفيكاتتار تابىس ەتىلدى.
