بۇل تۋرالى اتىراۋ وبلىستىق ماسليحاتىنداعى «Nur Otan» پارتياسى دەپۋتاتتىق فراكتسياسى وتىرىسىندا بەلگىلى بولدى.
الدىمەن فيليال توراعاسى، ايماق باسشىسى ماحامبەت دوسمۇحامبەتوۆ سايلاۋالدى باعدارلامانىڭ ورىندالىسىنىڭ ماڭىزدىلىعىن اتاپ ءوتتى.
«ەلىمىزدىڭ تۇڭعىش پرەزيدەنتى، پارتيا ليدەرى نۇرسۇلتان نازارباەۆ «Nur Otan» پارتياسىنىڭ 2025 جىلعا دەيىنگى «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىن ورىنداۋ جونىندەگى «جول كارتاسىن» ازىرلەپ، جاريا تۇردە قاراۋدى تاپسىرعان بولاتىن.
ەلباسى: «ماجىلىستەگى پارتيا فراكتسياسىمەن كەزدەسۋدە ءبىزدىڭ نەگىزگى مىندەتىمىز - بارلىق سايلاۋالدى ۋادەلەرىمىزدى ورىنداۋ جانە سايلاۋشىلاردىڭ سەنىمىن اقتاۋ»، - دەپ ناقتىلاپ ايتقان بولاتىن»،- دەدى وبلىس اكىمى.
ال، «جول كارتاسىنىڭ» بيىلعى ءبىرىنشى جارتىجىلدىق بويىنشا ورىندالىسىن بايانداعان فيليال توراعاسىنىڭ ءبىرىنشى ورىنباسارى مەيىرىم قالاۋي، الداعى جىلدىڭ جوسپارلارىنا دا توقتالدى.
«ايماق تۇرعىندارىنىڭ تابىسىن ارتتىرۋ ماقساتىندا وبلىس كولەمىندە الداعى بەسجىلدىقتا 10 ءىرى ينۆەستيتسيالىق جوبانى ىسكە اسىرۋ جوسپارلانۋدا. ولاردىڭ ىشىندە ونەركاسىپ سالاسىندا 4 جوبا، اۋىل شارۋاشىلىعى سالاسىندا 2 جوبا بار. سونىمەن قاتار، تۇرعىن ءۇي-كوممۋنالدىق شارۋاشىلىق سالاسى بويىنشا اتىراۋ وبلىسىندا 3,5 ملن. شارشى مەتر تۇرعىن ءۇيدى پايدالانۋعا بەرىپ، 7 مىڭ وتباسىن باسپانامەن قامتاماسىز ەتۋ جوسپارلانۋدا»،- دەدى م.قالاۋي.
سونداي-اق، 10 مەديتسينالىق نىسان جانە 11 مەكتەپ پەن 56 بالاباقشانىڭ، 22 سپورت كەشەنىنىڭ قۇرىلىسىن سالۋ ارقىلى حالىقتىڭ ءال-اۋقاتىن كوتەرۋ كوزدەلگەنىن دە جەتكىزدى.
وعان قوسا، «بيزنەستىڭ جول كارتاسى – 2025» باعدارلاماسى اياسىندا كەمىندە 1000 جوبانى سۋبسيديالاۋ، اۋىل بيزنەسىن دامىتۋ ماقساتىندا «بيزنەس ايماق» وڭىرلىك باعدارلاماسى اياسىندا 300 شاعىن نەسيەلەندىرۋ جوسپارلانۋدا ەكەنى ءمالىم ەتىلدى.
مەيرىم قالاۋي جەرگىلىكتى اتقارۋشى ورگان باسشىلارىنىڭ سايلاۋشىلارمەن كەرى بايلانىسىن نىعايتۋ بويىنشا جۇمىستى جانداندىرۋ جوسپاردا تۇرعانىن دا جەتكىزدى.
كەزدەسۋ بارىسىندا «Nur Otan» پارتياسى اتىراۋ وبلىستىق فيليالى جانىنداعى «ءبىلىم جانە عىلىمدى دامىتۋ جونىندەگى» ايماقتىق قوعامدىق كەڭەسىنىڭ توراعاسى، وبلىستىق ءماسليحاتتىڭ دەپۋتاتى سالامات يدريسوۆ اتالعان جول كارتاسى اياسىندا ءبىلىم بەرۋ باعىتىنداعى كەيبىر ءتۇيىندى ماسەلەلەر شەشىمىن تاباتىندىعىن جەتكىزدى.
«سايلاۋالدى باعدارلامادا قامتىلعان ماڭىزدى سالانىڭ ءبىرى – ساپالى جانە قولجەتىمدى ءبىلىم بەرۋ. وسى ورايدا وڭىرىمىزدە اتىراۋ وبلىسىنىڭ اكىمى ماحامبەت دوسمۇحامبەتوۆتىڭ تىكەلەي تاپسىرماسىمەن «2021-2023 جىلدارعا ارنالعان اتىراۋ وبلىسىندا ءبىلىم بەرۋدى دامىتۋ جول كارتاسى» ازىرلەندى. وسى قۇجاتقا سايكەس بۇگىندە وبلىستىق ءبىلىم بەرۋ باسقارماسى “نازارباەۆ زياتكەرلىك مەكتەپتەرى” دەربەس ءبىلىم بەرۋ ۇيىمدارىمەن بىرلەسىپ، وبلىس اۋماعىنداعى 50 مەكتەپتى زەردەلەدى. كەشەندى زەرتتەۋ ناتيجەلەرى بويىنشا اتىراۋلىق مەكتەپتەردەگى ءبىلىم بەرۋ پروبلەمالارى انىقتالدى. ماماندار وسى ماسەلەلەر جول كارتاسى اياسىندا شەشىلەدى دەپ بولجاپ وتىر»،-دەدى ول.
كەزدەسۋ سوڭىندا فيليال توراعاسى، وبلىس اكىمى ماحامبەت دوسمۇحامبەتوۆ اتىراۋ قالاسى، اۋداندار اكىمدەرى پارتيانىڭ سايلاۋالدى باعدارلاماسىنىڭ ورىندالىسىن باقىلاۋعا الۋدى تاپسىردى. سونىمەن قاتار، ءار توقسان سايىن «جول كارتاسىنىڭ» ورىندالۋى بويىنشا جەرگىلىكتى اتقارۋشى ورگانداردىڭ ەسەپتەرى تىڭدالىپ، بارلىق الەۋمەتتىك توپتارمەن تىعىز بايلانىس ورناتىپ، حالىقپەن تۇراقتى تۇردە كەزدەسۋلەر وتكىزۋدى جۇكتەدى.
ايتا كەتەيىك، بۇگىنگى كۇنى جۇيەلى مونيتورينگتى ۇيىمداستىرۋ ءۇشىن وبلىس بويىنشا 9 جول كارتاسى بەكىتىلىپ، سايلاۋالدى باعدارلامانىڭ ناقتى باعىتتارىنىڭ ىسكە اسىرىلۋىن باقىلاۋ ماقساتىندا 78 ايماقتىق جانە اۋماقتىق قوعامدىق كەڭەستەر قۇرىلعان.
