14 جاستاعى كەمەرون ەسىمدى امەريكالىق ءجاسوسپىرىم — قازاق ءتىلىن ۇيرەنۋگە قىزىعۋشىلىق تانىتىپ جۇرگەن جاستاردىڭ ءبىرى. بۇگىندە ول الەۋمەتتىك جەلى ارقىلى ءوز بىلگەندەرىن زامانداستارىمەن دە ءبولىسىپ ءجۇر. «ادىرنا» ءتىلشىسى ارۋمەن تىلدەسىپ، ءتىل ۇيرەنۋگە دەگەن قۇلشىنىسىنىڭ قالاي اشىلعانىن سۇراپ ءبىلدى.
«سالەمەتسىز بە! شىن ەسىمىم – كەمەرون، الايدا ءوزىمدى ايبالا دەگەن قازاق ەسىمىمەن اتاعاندى ۇناتامىن. بۇل ەسىمدى كەزدەيسوق كورىپ قالدىم. ماعىناسى، دىبىستالۋى كوڭىلىمنەن شىقتى. ءدال قازىرگى ساتتە اقش-تىڭ دجوردجيا شتاتىندا تۇرىپ جاتىرمىن»،–دەدى ول.
9-سىنىپ وقۋشىسىنىڭ قازاق ءتىلىن ۇيرەنىپ جۇرگەنىنە ەكى جىلدىڭ ءجۇزى بولعان.
«ءتىلدى بىلۋگە دەگەن قۇشتارلىعىم 2019 جىلدان باستالدى. سەبەبى سول جىلى ينتەرنەتتە جۇكتەلگەن قازاقشا بەينەجازبانى قۇلاعىم شالىپ قالعان ەدى. مەن قازاقتىڭ تىلىنە عاشىق بولدىم. ول ادەمى ءارى اۋەزدى. قازاق مادەنيەتى تۋرالى بىلگەننەن كەيىن سىزدەردىڭ انا تىلدەرىڭىزدە سويلەگىم كەلەدى دەگەن ىنتام ودان ءارى ارتا ءتۇستى. بۇگىندە ەڭبەكتەنۋ ۇستىندەمىن. اتا-انام ەشقانداي قارسىلىق تانىتپادى. سەبەبى ولار مەنىڭ پوليگلوت بولعىم كەلەتىنىن جاقسى بىلەدى»،— دەپ اڭگىمەسىن جالعاستىردى كەيىپكەرىمىز.
قازىرگى تاڭدا ايبالا 20-دان استام تىلدە ويىن جەتكىزە الادى. ولاردىڭ ىشىندە قازاق جانە بيرما تىلدەرىن ۇيرەنۋ قيىنعا سوققان.
ءجاسوسپىرىم ارمانشىل ەكەنىن اتاپ ءوتتى.
«شىنى كەرەك، مەنىڭ ارماندارىم وتە كوپ. ەڭ ىرىلەرىنە توقتالىپ وتەيىن. ەڭ ءبىرىنشىسى – قازاقستانعا بارۋ، ەكىنشىسى – 100 تىلدە سويلەپ ۇيرەنۋ، ءۇشىنشىسى — باقىتتى وتباسىن قۇرۋ ، ءتورتىنشىسى - اۋرۋعا شالدىققان بۇلدىرشىندەر مەن بالالارعا كومەك كورسەتۋ ءۇشىن قايىرىمدىلىق ۇيىمىن قۇرۋ»،–دەدى ايبالا.
اڭگىمەلەسكەن ديانا اسان،
«ادىرنا» ۇلتتىق پورتالى
