14 jastaǵy Kemeron esimdi amerıkalyq jasóspirim — qazaq tilin úırenýge qyzyǵýshylyq tanytyp júrgen jastardyń biri. Búginde ol áleýmettik jeli arqyly óz bilgenderin zamandastarymen de bólisip júr. «Adyrna» tilshisi arýmen tildesip, til úırenýge degen qulshynysynyń qalaı ashylǵanyn surap bildi.
«Sálemetsiz be! Shyn esimim – Kemeron, alaıda ózimdi Aıbala degen qazaq esimimen ataǵandy unatamyn. Bul esimdi kezdeısoq kórip qaldym. Maǵynasy, dybystalýy kóńilimnen shyqty. Dál qazirgi sátte AQSh-tyń Djordjııa shtatynda turyp jatyrmyn»,–dedi ol.
9-synyp oqýshysynyń qazaq tilin úırenip júrgenine eki jyldyń júzi bolǵan.
«Tildi bilýge degen qushtarlyǵym 2019 jyldan bastaldy. Sebebi sol jyly ınternette júktelgen qazaqsha beınejazbany qulaǵym shalyp qalǵan edi. Men qazaqtyń tiline ǵashyq boldym. Ol ádemi ári áýezdi. Qazaq mádenıeti týraly bilgennen keıin sizderdiń ana tilderińizde sóılegim keledi degen yntam odan ári arta tústi. Búginde eńbektený ústindemin. Ata-anam eshqandaı qarsylyq tanytpady. Sebebi olar meniń polıglot bolǵym keletinin jaqsy biledi»,— dep áńgimesin jalǵastyrdy keıipkerimiz.
Qazirgi tańda Aıbala 20-dan astam tilde oıyn jetkize alady. Olardyń ishinde qazaq jáne bırma tilderin úırený qıynǵa soqqan.
Jasóspirim armanshyl ekenin atap ótti.
«Shyny kerek, meniń armandarym óte kóp. Eń irilerine toqtalyp óteıin. Eń birinshisi – Qazaqstanǵa barý, ekinshisi – 100 tilde sóılep úırený, úshinshisi — baqytty otbasyn qurý , tórtinshisi - aýrýǵa shaldyqqan búldirshinder men balalarǵa kómek kórsetý úshin qaıyrymdylyq uıymyn qurý»,–dedi Aıbala.
Áńgimelesken Dıana ASAN,
«Adyrna» ulttyq portaly
