ۆاكتسيناتسياعا قارسىلىق تانىتىپ، ءتىپتى سوعان وراي اكتسيا ۇيىمداستىرعان ەلوردالىق كوپبالالى انا ەكپەنىڭ ماڭىزدىلىعىن تۇسىنگەنىن ايتتى. جەتى بالانىڭ اناسى ءبىراز ۋاقىت اسكەردەگى ۇلىنىڭ ۆاكتسينا الۋىنا رۇقساتىن بەرمەگەن ەكەن.
نۇر-سۇلتان قالاسىنىڭ تۇرعىنى - زيۋار جۇمانوۆا وسى ۋاقىتقا دەيىن ۆاكتسينا سالدىرۋعا بەلسەندى تۇردە قارسىلىق بىلدىرگەندەردىڭ ءبىرى. سەبەبى، قىستا تۇماۋعا قارسى ەكپە العان كەزىندە، اۋرۋىن اسقىندىرىپ العان. بۇدان بولەك، ءتۇرلى مەسسەندجەرلەردەگى الىپ-قاشپا اڭگىمەلەر دە ونىڭ ۆاكتسيناعا دەگەن سەنىمسىزدىگىن ارتتىرعان. ءوز كەزەگىندە زيۋار جۇمانوۆا انتيۆاكسەرلەرمەن بىرگە ەكپەگە قارسى اكتسيا دا وتكىزبەك بولعان ەكەن.
«نەگىزىندە ۆاكتسيناعا قارسى ەكى توپ اشتىق. كوپتەگەن قورقىنىشتى اقاپاراتتار تاراتىلىپ ءجۇردى. ۆاكتسيناتسيالاۋ باستالادى دەگەننەن كەيىن بايتەرەكتىڭ جانىندا اكتسيا ۇيىمداستىردىم. بىراق وعان ءوزىم عانا شىقتىم. كەيىن مەنى پوليتسيا قىزمەتكەرلەرى كەرى قايتاردى»، - دەيدى زيۋار جۇمانوۆا.
زيۋار جۇمانوۆانىڭ تۇڭعىشى بۇگىندە الماتى وبلىسىندا اسكەري بورىشىن وتەپ ءجۇر. كوپبالالى انا العاشىندا ۇلىنىڭ ۆاكتسينا الۋىنا بارىنشا قارسىلىق تانىتقان. الايدا، ەكپە سالدىرعان ساربازداردىڭ تۇگەلدەي ءدىن امان ەكەنىنە كوز جەتكىزگەن سوڭ رۇقساتىن بەرىپتى.
اۋرۋحانادا ءومىر مەن ءولىم اراسىندا جاتقان ادامداردىڭ جاعدايىن ءوز كوزىمەن كورگەن كوپبالالى انا بۇگىندە ويى وزگەرگەنىن ايتادى.
«قازىر مەن ۆاكتسيناعا قارسى ەمەسپىن. ەرتەڭ ناۋقاستار سىرتتا ەمىن-ەركىن ءجۇرىپ، بارلىعىنا جۇقتىرسا، وعان كىم كىنالى بولادى؟ سول ءۇشىن اياعىمدى كەرى تارتتىم. مەن ۆاكيتسيناعا قارسى شىعا المايمىن، ەكپە العان بالام ساۋ، قايىن-جۇرتىم ءدىن امان، سوعان شۇكىر دەپ وتىرمىن»، - دەدى ەلوردالىق كوپبالالى انا.
اقپارات azattyq-ruhy.kz سايتىنان الىندى
