WhatsApp مەسسەندجەرىندە ۆيرۋستىڭ دەلتا نۇسقاسىنان تۋىنداعان COVID-19 اۋرۋىنىڭ بەلگىلەرى پاتوگەننىڭ باسقا نۇسقالارى تۋدىرعانداردان ايتارلىقتاي ەرەكشەلەنەدى دەگەن اقپارات تارادى. پايدالانۋشىلار دەلتا نۇسقاسىن جۇقتىرعان پاتسيەنتتەردە جوتەل دە، جوعارى تەمپەراتۋرا دا بولمايدى دەپ جازادى، بۇل تۋرالى ءيزرايلدىڭ دەنساۋلىق ساقتاۋ مينيسترلىگى حابارلاعان ەكەن. بۇل جالعان دەپ حابارلايدى stopfake.kz.
ءيزرايلدىڭ دەنساۋلىق ساقتاۋ مينيسترلىگىنىڭ رەسمي سايتىندا دەلتا نۇسقانىڭ بەلگىلەرىنە جوتەل مەن بەزگەك جاتپايتىنى تۋرالى اقپارات جوق.
سونىمەن قاتار، عالىمدار دەلتا نۇسقاسىن جۇقتىرۋعا ءتان بەلگىلەر الدىڭعى مۋتاتسيالارعا ءتان بەلگىلەردەن ءىس جۇزىندە ەرەكشەلەنبەيتىنىن مالىمدەدى. پروفەسسور تيم سپەكتوردىڭ ايتۋىنشا، دەلتا نۇسقاسىن جۇقتىرعانداردا قاتتى سۋىق ءتيۋدىڭ بەلگىلەرى بولادى. ەڭ ءجيى كەزدەسەتىندەرى: جوتەل، دەنە قىزۋىنىڭ كوتەرىلۋى، مۇرىننىڭ اعۋى، السىزدىك، ءيىس پەن ءدام سەزۋدىڭ جوعالۋى.
وكلاحوما ۋنيۆەرسيتەتىنىڭ دارىگەرى جانە ەرىكتى وقىتۋشىسى دوكتور دجوردج مونكس ءوزىنىڭ Twitter-دەگى اككاۋنتىندا دەلتا نۇسقاسى كوبىنەسە جوتەل، تىنىس الۋدىڭ قيىنداۋى، بەزگەك، دەنەنىڭ اۋىرسىنۋىن تۋدىراتىنىن حابارلاعان. ونىڭ مالىمەتىنشە، ءيىس پەن ءدامنىڭ جوعالۋى ۆيرۋستىڭ باسقا نۇسقالارىن جۇقتىرۋدىڭ بەلگىلەرىمەن سالىستىرعاندا از بولادى.
باسقا ماماندار تاماقتىڭ جىبىرلاۋى، مۇرىننىڭ بىتەلۋى جانە باس اۋرۋى دەلتا نۇسقاسىن جۇقتىرۋعا ءتان دەپ سانايدى.
سونىمەن قاتار، تاراتىلعان حابارلامادا ۆيرۋستىڭ بەلگىلەرىنە قاتىستى ناقتى فاكتولوگيالىق قاتەلىكتەرگە قاراماستان، ءىشىنارا دۇرىس دەپ ساناۋعا بولاتىن الدىن الۋ بويىنشا ۇسىنىستار كورسەتىلگەن. دەلتا نۇسقاسىنىڭ تارالۋىنا بايلانىستى ءالى دە بەتپەردە تاعۋ، الەۋمەتتىك قاشىقتىقتى ساقتاۋ جانە ادامدار كوپ جينالاتىن ورىندارعا قاجەتسىز بارماۋ ۇسىنىلادى.
ەگەر بويىڭىزدان COVID-19 بەلگىلەرى بايقالسا، دەرەۋ كاسىبي مەديتسينالىق كومەككە جۇگىنىڭىزدەر.
