قاراعاندىدا دارىگەرلەر العاش رەت "حاياتۆاك" ۆاكتسيناسىن العان ستۋدەنتكە "سپۋتنيك-V" ۆاكتسيناسىنىڭ ەكىنشى كومپونەنتىن سالىپ جىبەرگەن دەپ حابارلايدى "ادىرنا" ۇلتتىق پورتالى "كتك" ارناسىنا سىلتەمە جاساپ.
وسى جاعدايدان كەيىن ەندى ەكپە ورتالىقتارىندا ءار ۆاكتسينا ءۇشىن جەكە كابينەتتەر اشىلاتىن بولدى.
ناقتىراق ايتساق، قاراعاندىدا 19 جاستاعى ستۋدەنت قىز بەن ونىڭ اپكەسى ۆاكتسينانىڭ ەكىنشى كومپونەنتىن الۋعا بىرگە كەلگەن. ءسىڭلىسى ەكپەگە كىرىپ شىققاننان كەيىن وزىنە سالىنعان ەكپەنىڭ "سپۋتنيك-V" ەكەنىن بايقاعان. بۇعان دەيىن ەكەۋى دە "حاياتتى" العان. ستۋدەنتكە ەكىنشى كومپونەنتتى "سپۋتنيكتەن" سالىپ جىبەرگەنى انىقتالعان.
بۇگىندە ونىڭ دەنساۋلىعى بىرقالىپتى. ستۋدەنت قىز ۆاكتسينانى سانكت-پەتەربورعا وقۋعا باراردا قيىندىق تۋماسىن دەپ ءوز ەركىمەن سالدىرىپتى. ەندى ول كۇن سايىن ءوزىنىڭ دەنساۋلىعى جايىندا دارىگەرلەردى حاباردار ەتۋى ءتيىس. ال كومپونەتتەردى شاتاستىرىپ العان مەدبيكە جازالاندى.
"قاتە جىبەرگەن مەديتسينا قىزمەتكەرىنە تارتىپتىك جازا قولداندىق. ول ەكپە جۇمىستارىنان شەتتەتىلدى. شاتىستىرماس ءۇشىن ەندى ۆاكتسينانىڭ ءار تۇرىنە جەكە كابينەتتەر بەلگىلەندى. ال ەكى ءتۇرلى ۆاكتسينانىڭ كومپونەتتەرىن العان قاراعاندى قالاسىنىڭ تۇرعىنى ءبىزدىڭ ەرەكشە باقىلاۋىمىزعا الىندى. ءتىپتى بۇل جونىندە رەسپۋبليكالىق دارىگەرلەر كونسيليۋمىن وتكىزۋدى جوسپارلاپ وتىر", - دەيدى قاراعاندى قالاسى №1 ەمحانا ديرەكتورىنىڭ ورىنباسارى يرينا كۋزنەتسوۆا.
دارىگەرلەر ەكپە الاتىن ازاماتتارعا بارىنشا مۇقيات بولۋعا كەڭەس بەرەدى.
"ادىرنا" ۇلتتىق پورتالى.
