وسى جولى اياگۇلدىڭ اۋىر قازاسىنا ءورىستىلدى اۋديترويا دا شۋلاپ كەتتى. ادەتتە ەشتەڭەگە ءمان بەرمەيتىن، قارا باسىنىڭ عانا قامىمەن كەتكەن ءورىستىلدى اۋديتوريانىڭ شۋلاپ كەتۋىنە نە تۇرتكى بولدى ەكەن... مەن وسى جولى ولاردىڭ ورىس ءتىلدى سەگمەنتتەرىندە قانداي جاڭالىقتار بار ەكەن دەپ اناليزدەپ كورگەن ەدىم.
ءتىپتى ىشىندە ورىس ۇلتىنان، باسقا دا ۇلتتان، قازاقستاننىڭ ازاماتتارى اياگۇلدىڭ قازاسىنا جان-تانىمەن كۇيىپ وتىرىپ جازعان پىكىرلەرىنەن وقىپ شىقتىم.
ادەتتە، ۇلت ماسەلەسىنە، ءتىل ماسەلەسىنە، باسقا دا قۇندىلىقتارعا كەلگەندە اسا ءمان بەرە قويمايتىن ءورىستىلدى سەگمەنتتى ايانىڭ تاعدىرى تولعانتىپ تاستاپتى. ولاردىڭ ىشىندە "ادىلەتتى تەكسەرىس بولسىن، اق قاراسىن انىقتاسىن" دەپ وتىرعانداردىڭ قاراسى وتە كوپ. وسى مەنى تاڭ قالدىرىپ وتىر. ال، قازاق سەگمەنتىندە "ولگەن ادام ءولدى، ارتىن قازبالاپ كەرەگى نە؟ بالە ىزدەمەڭدەر. ارۋاقتى جايىنا قالدىرىڭدار" دەگەن سىڭايداعى سوزدەر قارشا بوراپ جاتىر. ەكى مەنتاليتەت، ەكى ءتۇرلى كوزقاراس، ەكى ءتۇرلى الەم، بىراق ءبىر مەملەكەت.
قازاقتىڭ جانى اياۋلى قىزى اياگۇلدىڭ ءولىمى ءبىزدىڭ قوعامنىڭ سونداي قاتىگەز، شىندىقتى، اقيقاتتى ەشبىر جەردە جاقتامايتىن، ادىلەتسىز، وپاسىز، وركەنيەتسىز، تۇرلاۋى جوق تىرلىككە بەيىم، جاۋاپكەرشىلىكتەن جۇرداي ەكەنىن اڭقايتىپ تاعى دا اشىپ بەرىپ وتىر. بايقاپ قاراساڭىز، قازاق سەگمەنتىندە ادام ءولىمى مەن ونىڭ جاۋاپكەرلىشىگى جايىندا، اق-قاراسىنا نەمقۇرايلى قارايتىن ادامداردىڭ قاراسى وتە-وتە باسىم ەكەن. مۇنى جۇرەكسىز قوعام دەسە دە قاتەلىك ەمەس.
پەرىشتە جاندى جازۋشىنىڭ رۋحى ءالى تالاي سىرەسىپ قالعان، زۇلىمدىقپەن، ادىلەتسىزدىكپەن توقىلعان ورمەكشىنىڭ تورىنداي بۇعاتتاردى قيراتىپ وتەتىن سياقتى. اركىمنىڭ جەكە باسىندا ءبىر شىندىعى بار. اقيقات ءوز الدىنا بولەك دۇنيە. اقيقات اشىلسا، تالاي ادام جەرگە قارايدى، ءتىپتى جەرگە كىرىپ تە كەتۋى مۇمكىن.
ۋاقىت تورەشى!
مەن ءوزىمىزدىڭ وزىمىزگە ادىلەتسىز بولىپ وتىرعانىمىزدى ايتىپ وتىرمىن.
بەكبولات قارجان،
"ادىرنا" ۇلتتىق پورتالى
