تۇركىستان وبلىسىندا كونە تۇركى داۋىرىنە قاتىستى ەرەكشە ءپىشىندى تاس ءمۇسىن تابىلدى دەپ حابارلايدى "ادىرنا" ۇلتتىق پورتالى.
بۇل تۋرالى تاريح عىلىمدارىنىڭ دوكتورى، قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پروفەسسورى مۇحتار قوجا الەۋمەتتىك جەلىلەردە جازدى.
ەسكەرتكىشتى ساپاربەك اسقاربەكۇلى دەگەن جەرگىلىكتى ازامات تاۋىپ، ءتيىستى ماماندارعا حابارلاعان.
اتالعان تاس ءمۇسىندى كورۋ ءۇشىن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى ارحەولوگيا عىلىمي زەرتتەۋ ينستيتۋتىنىڭ باس عىلىمي قىزمەتكەرى مۇحتار قوجا باستاعان ماماندار الدىن-الا زەرتتەۋ جۇمىستارىن جۇرگىزدى.
ماماندار كونە تۇركى داۋىرىنە جاتاتىن تاس ءمۇسىننىڭ بەينەسى تۋرالى ءتۇرلى بولجامدار ايتۋدا. جۇرگىزىلگەن زەرتتەۋ جۇمىستارىنىڭ ناتيجەسى الداعى ۋاقىتتا جاريالانادى.
ايتا كەتۋ كەرەك، وسى تاس مۇسىنگە ۇقساس ەسكەرتكىشتەر قازاقستاننىڭ وڭتۇستىگىندە، قىرعىزستاندا، سونداي-اق التاي وڭىرىندە كۋدىرگە كەشەنىندە تابىلعان بولاتىن.
"ادىرنا" ۇلتتىق پورتالى.
