500 جۇمىسشىنىڭ جانايقايى: كىم كىنالى؟

2353
Adyrna.kz Telegram

سولتۇستىك قازاقستاندا وبۋحوۆ تاۋ-كەن بايىتۋ كومبيناتىندا وندىرىلگەن ونىمدەردى تاسىمالداۋعا جەرگىلىكتى پوليتسيا كەدەرگى كەلتىرىپ، سونىڭ سالدارىنان كاسىپورىننىڭ جۇمىسى توقتاپ قالعان.  ەكسپورتتىڭ ارقاسىندا جالاقى الىپ وتىرعان جۇمىسشىلار ەندى جۇمىسسىز قالاتىندارىنا الاڭداۋلى  دەپ حابارلايدى "ادىرنا" ۇلتتىق پورتالى "ەۋرازيا" ءبىرىنشى ارناسىنا سىلتەمە جاساپ.

بيزنەسكە نەگىزسىز كەدەرگى كەلتىردى دەپ شاعىمدانعان كومبينات جۇمىسشىلارى ەندى ەل پرەزيدەنتىنە حات جولداماق.

ولار جەرگىلىكتى پوليتسيا كاسىپورىن اۋماعىنان شىققان شيكىزاتتى دىتتەگەن جەرىنە جەتكىزبەستەن، جولاي تاركىلەپ جاتقانىن ايتادى. جۇك تاسىمالدايتىن كولىكتەردىڭ جولىنا نە سەبەپتى توسقاۋىل قويىلعانىن قۇزىرلى ورىندار ماردىمدى تۇسىندىرمەگەن.

"3 ماۋسىمنان بەرى كۇن سايىن ءبىزدىڭ جۇك تاسىمالدايتىن كولىكتەر توقتاتىلادى. سەبەبى ءتۇسىندىرىلىپ جاتقان جوق. پروكۋروردىڭ تاپسىرماسى دەگەن ءۋاج ايتىپ وتىر. ەگەر كونتسەنتراتتى ەكسپورتتاي الماساق جۇمىسكەرلەردىڭ دە جالاقىسىن بەرە المايمىز. الدىڭعى كۇنى تۇندە پوليتسيا كونتسەنتراتتى تاعى دا الىپ قويدى", — دەيدى وبۋحوۆ تاۋ-كەن بايىتۋ كومبيناتىنىڭ ديرەكتورى دانيل دولگالەۆ.

80 توننا تسيركوني كونتسەنتراتى تەمىرجول ارقىلى رەسەي مەن قىتايعا ەكسپورتتالۋى ءتيىس ەدى. بىراق 17 ملن تەڭگەنىڭ تاۋارى قازىر پوليتسيا بولىمشەسىنىڭ اۋماعىندا قاڭتارىلىپ تۇر. ال قۇزىرلى ورىندار ءبىز بار بولعانى سوتتىڭ ۇكىمىن ورىنداپ وتىرمىز دەپ اقتالۋدا.

"تايىنشا اۋداندىق پوليتسيا ءبولىمى وندىرىسىندە سوتتىڭ ۇكىمىن ورىنداماۋ بويىنشا، قىلمىستىق ءىس بار. سول قىلمىستىق ءىس بويىنشا كەشە اۆتوكولىكتەر توقتاتاتىلىپ، زاتتىق دالەلدەمەلەر تاركىلەندى. قازىرگى ۋاقىتتا قىلمىستىق ءىس بويىنشا تەرگەۋ ارەكەتتەرى جۇرگىزىلۋدە. قالعان اقپارات جاريالانۋعا جاتپايدى", — دەيدى تايىنشا اۋداندىق پوليتسيا ءبولىمى باستىعىنىڭ ورىنباسارى قايرات حاسەنوۆ.

وسىلايشا سەرىكتەستىك ديرەكتورىنا قاتىستى قوزعالعان قىلمىستىق ءىستىڭ كەسىرى 500-گە تارتا قىزمەتكەردىڭ دە دەگبىرىن قاشىرعان. الداعى ۋاقىتتا مۇنداي كەدەرگىلەر جالعاسا بەرەتىن بولسا، زاۋىتتىڭ جۇمىسى تۇرالاپ، ءتىپتى جابىلىپ تا قالۋى مۇمكىن. بىرنەشە جىلدان بەرى كەن ورنىندا ناپاقاسىن تاۋىپ وتىرعان تۇرعىندار ەندى پرەزيدەنتتەن كومەك سۇراۋعا ءماجبۇر.

ايتا كەتۋ كەرەك، وبۋحوۆ تاۋ-كەن بايىتۋ كومبيناتى —  ەلىمىزدەگى بىرەگەي كەن ورىندارىنىڭ ءبىرى. مۇندا تيتان-تسيركوني ءوندىرىلىپ، سىرت مەملەكەتتەرگە ەكسپورتتالادى. اتالمىش سەرىكتەستىك جالاقى كورسەتكىشى بويىنشا دا وڭىردە ءبىرىنشى ورىندا.

 

"ادىرنا" ۇلتتىق پورتالى.

 

پىكىرلەر