يسپانيادا الەمگە تانىمال قازاقستاندىق ءانشى ديماش قۇدايبەرگەن تۋرالى دەرەكتى ءفيلمنىڭ پرەمەراسى وتەدى. بۇل جوبا ءانشىنىڭ يسپانيالىق جانكۇيەرلەرىنىڭ باستاماسىمەن جۇزەگە اسقان. بۇل تۋرالى Dimashnews سايتى جازدى، دەپ حابارلايدى “ادىرنا”.
اقپاراتقا سايكەس، دەرەكتى ءفيلمدى جاساۋعا يسپانيالىق فان-كلۋب پەن Gran Voz Kazaja قاۋىمداستىعى اتسالىسقان. جوبامەن جۇمىس شامامەن ەكى جىلعا سوزىلىپ، 2024 جىلدىڭ قازان ايىندا باستالعان. ال ءفيلمنىڭ تۇساۋكەسەرى 2026 جىلدىڭ 30 مامىرىنا جوسپارلانعان. كورسەتىلىم Palacio de Hielo كينوتەاترىندا، مادريد قالاسىنىڭ ورتالەسا اۋدانىندا وتەدى.
تۋىندىنىڭ نەگىزىنە 20 ساعاتتان استام بەينەماتەريال ەنگىزىلگەن. ولاردىڭ قاتارىندا ارحيۆتىك جازبالار، فوتوسۋرەتتەر جانە ءتۇرلى سۇحباتتار بار. فيلمدە ەرەكشە نازار بەس جانكۇيەردىڭ جەكە وقيعالارىنا اۋدارىلعان. ولار ءوز تاجىريبەلەرىمەن ءبولىسىپ، ديماشتىڭ شىعارماشىلىعى ولاردىڭ ومىرىنە قالاي اسەر ەتكەنىن باياندايدى.
جوبا اۆتورلارى ءانشىنىڭ تەك شىعارماشىلىق جولىن عانا ەمەس، ونىڭ حالىقارالىق اۋديتورياسىمەن ەرەكشە بايلانىسىن دا كورسەتۋدى ماقسات ەتكەن. فيلم ارقىلى ولار ديماشتىڭ ونەرىن الەمدىك دەڭگەيدە ودان ءارى ناسيحاتتاۋدى كوزدەيدى.
دەرەكتى ءفيلمنىڭ رەجيسسەرى — يسپانيالىق اۆتور داۆيد كوليانتەس رودريگەس. ول ءتۇسىرىلىم پروتسەسى مەن مونتاج جۇمىستارىنا دا تىكەلەي قاتىسقان.
