ءماجىلىس دەپۋتاتى بولات كەرىمبەك اسكەري قىزمەتكەرلەرگە قاتىستى تولەمدەر مەن وتەماقىلاردى قىسقارتۋ تۋرالى ۇسىنىستارعا بايلانىستى تۇسىنىكتەمە بەردى. ونىڭ ايتۋىنشا، قوعامدا تاراعان اقپاراتتىڭ تاقىرىبى بۇرمالانىپ بەرىلگەن، دەپ حابارلايدى "ادىرنا".
دەپۋتات ءوز سوزىندە اسكەري قىزمەتكەرلەردىڭ الەۋمەتتىك جاعدايىن السىرەتۋگە قارسى ەكەنىن اتاپ ءوتتى. ول ماجىلىستەگى قورعانىس كوميتەتىنىڭ مۇشەسى رەتىندە اسكەريلەردىڭ تۇرعىن ءۇي تولەمدەرىن قىسقارتۋعا نەمەسە الىپ تاستاۋعا قارسىلىق بىلدىرگەنىن جەتكىزدى. بۇل ماسەلە وتكەن جىلدىڭ تامىز ايىندا كوتەرىلگەن كەزدە دە كوميتەت تاراپىنان قولداۋ تاپپاعان.
“ماجىلىستە قوعانىس كوميتەتىنىڭ مۇشەسى رەتىندە اسكەريلەردىڭ ءۇي-جايلارىنا تولەنەتىن تولەمدەردىڭ قىسقارۋىنا نەمەسە الىپ تاستاۋىنا ءوز باسىم قارسىمىن. وتكەن جىلى تامىز ايىندا وسى ماسەلە كوتەرىلگەندە كوميتەت بولىپ قارسىلىق بىلدىردىك.
مەن دە ۇلتتىق اسكەرىمىزدىڭ قۋاتتى، ايبىندى بولۋىنا مۇددەلى ازاماتتىڭ ءبىرىمىن”،– دەدى دەپۋتات.
سونىمەن قاتار، دەپۋتات قوعام وكىلدەرىن تەك تاقىرىپقا قاراپ ەمەس، ماتەريالدىڭ مازمۇنىنا تولىق ءۇڭىلىپ، سارالاپ پىكىر بىلدىرۋگە شاقىردى.
كەرىمبەكتىڭ ايتۋىنشا، زاڭ جوباسىندا ناقتى بىرقاتار وزگەرىستەر قاراستىرىلعان. اتاپ ايتقاندا، اسكەري جانە ارنايى وقۋ ورىندارىنان تومەن ۇلگەرىم سەبەپتى شىعارىلعان ماگيسترانتتار مەن دوكتورانت وفيتسەرلەرگە بەرىلەتىن كەيبىر وتەماقىلاردى الىپ تاستاۋ ۇسىنىلادى. بۇعان دەيىن وقۋىن اياقتاماعان تۇلعالارعا دا جول شىعىندارى، سونىڭ ىشىندە اۋە بيلەتتەرى تولەنىپ كەلگەن.
سونداي-اق، ەگەر ەرلى-زايىپتىلاردىڭ ەكەۋى دە اسكەري قىزمەتكەر نەمەسە قۇقىق قورعاۋ ورگاندارىنىڭ قىزمەتكەرى بولسا، قىزمەتتىك اۋىس كەزىندە مۇلىكتى تاسىمالداۋعا ارنالعان وتەماقى تەك بىرەۋىنە عانا تولەنەدى. دەپۋتاتتىڭ پىكىرىنشە، وتباسى مۇلكى ورتاق بولعاندىقتان، ەكى تاراپقا بىردەي وتەماقى تولەۋ مەملەكەتتىك قاراجاتتى ءتيىمسىز پايدالانۋعا اكەلەدى.
ونىڭ ايتۋىنشا، ۇسىنىلىپ وتىرعان نورمالار بيۋدجەت قاراجاتىن ۇنەمدەۋگە جانە ونى ءتيىمدى بولۋگە باعىتتالعان
«ىسىراپشىلىققا جول جوق. زاڭ مەن ءتارتىپ بارلىق سالادا بولۋى ءتيىس»، – دەدى دەپۋتات.
بۇعان دەيىن «ادىرنا» ۇلتتىق پورتالىندا جاريالانعان ماتەريالدا بولات كەرىمبەك اسكەري قىزمەتكەرلەردىڭ وتباسىلارىنا ارنالعان تولەمدەر مەن جەڭىلدىكتەردى قىسقارتۋدى ۇسىندى دەگەن اقپارات تاراعان بولاتىن. الايدا كەيىن دەپۋتات بۇل باستامالاردىڭ اسكەري قىزمەتكەرلەردى جالپى قولداۋدى قىسقارتۋعا ەمەس، ناقتى ءتيىمسىز شىعىنداردى وڭتايلاندىرۋعا باعىتتالعانىن ءتۇسىندىردى. زاڭ جوباسى مەملەكەتتىك بيۋدجەتتى ءتيىمدى پايدالانۋ جانە ارتىق شىعىنداردى ازايتۋ ماقساتىندا ازىرلەنگەن.
