تۇركياداعى ءورت: 4 ادام كوز جۇمدى

5106
Adyrna.kz Telegram

تۇركيادا ورماننان باستالعان ءورت دەمالىس ايماعىنا دەيىن جەتىپ،  ءتىلسىز جاۋدىڭ كەسىرىنەن ءتورت ادام وپات بولدى دەپ حابارلايدى "ادىرنا" ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ.

28 شىلدەدە باستالعان قىزىل جالىن 42 اۋدانعا تارالىپ ۇلگەرگەن. ءتىپتى، جەرگىلىكتى بيلىك وكىلدەرى دەمالىس ورىندارىنداعى تۋريستەردى ەۆاكۋاتسيالاۋعا ءماجبۇر. اپات سالدارىنان ءتورت ادام قازا تاۋىپ، جەرگىلىكتى حالىقتىڭ ءتورت تۇلىگى قىرىلۋدا. تۇركيا بيلىگى انتاليادان 76 شاقىرىم جەردەگى ماناۆگات ايماعىندا ءورت قاتتى تارالعانىن ايتۋدا. الايدا ورتالىعىنا جەتپەگەن.

ء"ورت انتاليانىڭ ورتالىعىندا ەمەس، انتاليانىڭ شەتكى اۋداندارىندا بولدى. قازىرگى ۋاقىتتا ماناۆگات دەگەن قالادا ءتورت نۇكتەدە بولىپ جاتىر. بۇگىنگە دەيىن ءورتتى سوندىرە المادى.  تۋرا قاسىمىزدا بولىپ جاتقان جاعداي 1-2 ساعاتتىق جولدا", —  دەيدى ستۋدەنت دانا يساەۆا.

ءورت ورتالىققا جاقىنداماعانىمەن، ورمان ماڭىندا ورنالاسقان ايماقتارداعى دەمالىس ورىندارىن شارپىعان. دەرەۋ ارادا ولاردى ەۆاكۋاتسيالاپ قاۋىپسىز جەرگە كوشىرۋ جۇمىستارى جۇرگىزىلۋدە. ال بودرۋم قالاسىندا تۇتانعان قىزىل جالىندى ءورت سوندىرۋشىلەر دەرەۋ ارادا ءسوندىرىپتى. بارلىق تۋريستەر قوناق ۇيلەرىنە قايتىپ، ەشكىم زارداپ شەكپەگەن.

"انتالياداعى ءورت كەزىندە زارداپ شەككەندەردىڭ اراسىندا قازاقستان رەسپۋبليكاسىنىڭ ازاماتتارى جوق. ءبىزدىڭ كونسۋلدىق جەرگىلىكتى بيلىكپەن اركەز بايلانىستا. توتەنشە جاعداي كەزىندە نەمەسە وقىس جاعدايعا تاپ بولعان وتانداستارىمىزعا بىردەن تۋروپەراتورلارعا نەمەسە ءبىزدىڭ كونسۋلدىققا شۇعىل حابارلاسۋىن سۇرايمىز", — دەيدى قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ.

ەلدىڭ ءبىراز جەرىن شارپىعان الاپات ءورتتى تۇركيا بيلىگى ۇلتتىق اپات دەپ اتادى. قازىرگى ۋاقىتتا قىزىل جالىننىڭ ناقتى نەدەن شىققانى انىقتالۋدا.  71 ءورت وشاعىنىڭ 57-ءسى اۋىزدىقتالعان. ال ءتىلسىز جاۋمەن مىڭنان استام تەحنيكا جانە رەسەيدىڭ ءۇش ۇشاعى كۇرەسۋدە.

 

"ادىرنا" ۇلتتىق پورتالى.

پىكىرلەر