قاراعاندىداعى بوكەتوۆ ۋنيۆەرسيتەتىنە زەرتتەۋ ۋنيۆەرسيتەتى مارتەبەسى بەرىلدى، دەپ حابارلايدى "ادىرنا" ءتىلشىسى.
قازاقستان رەسپۋبليكاسى ۇكىمەتىنىڭ 2024 جىلعى 5 ساۋىردەگى №258 قاۋلىسىنا سايكەس ە.ا. بوكەتوۆ اتىنداعى قاراعاندى ۋنيۆەرسيتەتىنە زەرتتەۋ ۋنيۆەرسيتەتى مارتەبەسى بەرىلگەن.
QS Asia رەيتينگىندە ۋنيۆەرسيتەت حالىقارالىق دەڭگەيدە ءوزىنىڭ باسەكەگە قابىلەتتىلىگىن كورسەتە وتىرىپ، 206-شى ورىندا تۇر. ال جوو ۇجىمى 2000-عا جۋىق جوعارى بىلىكتى وقىتۋشىلاردان قۇرالىپ، ولاردىڭ اراسىندا اتاقتى عالىمدار، ۇلتتىق عىلىم اكادەمياسىنىڭ كوررەسپوندەنت-مۇشەلەرى جانە بەدەلدى عىلىمي ستيپەنديالاردىڭ لاۋرەاتتارى، «جوعارى وقۋ ورنىنىڭ ۇزدىك وقىتۋشىسى» جانە «ۇزدىك عىلىمي قىزمەتكەر» اتاقتارىنىڭ يەگەرلەرى بار.
پروفەسسور-وقىتۋشىلار قۇرامى - عىلىمي ويدىڭ دامۋىنا جانە بولاشاق مامانداردى دايارلاۋعا قۇندى ۇلەس قوساتىن تالانتتى ادامدار. ۋنيۆەرسيتەتتىڭ عىلىمي ينفراقۇرىلىمىندا 13 فاكۋلتەت، 20 عىلىمي-زەرتتەۋ ينستيتۋتى، عىلىمي ورتالىقتار مەن عىلىمي زەرتحانالار جۇمىس ىستەيدى. بۇگىندە جوعارى وقۋ ورنىندا جالپى سوماسى 2 ميلليارد تەڭگەگە جۋىق 112 عىلىمي جوبا ىسكە اسىرىلۋدا.
