قاراعاندى وبلىسىنداعى قۇلان وزەنىنىڭ بويىنان 86 كيىكتىڭ ولەكسەسى تابىلدى، دەپ حابارلايدى "ادىرنا".
قر ەكولوگيا جانە تابيعي رەسۋرستار مينيسترلىگى وقيعاعا قاتىستى تۇسىنىكتەمە بەردى.
"26 ماۋسىمىندا قاراعاندى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى قىزمەتكەرلەرىنىڭ، سونداي-اق نۇرا اۋدانى بويىنشا تابيعاتتى قورعاۋ پوليتسياسى قىزمەتكەرلەرىنىڭ قاتىسۋىمەن وتكەن بىرلەسكەن رەيدى بارىسىندا، قۇلان وزەنىنەن 86 كيىكتىڭ ولەكسى تابىلدى", - دەلىنگەن حابارلامادا.
مينيسترلىكتىڭ مالىمەتىنشە، كيىكتەردىڭ ولەكسەسىندە ىدىراۋ بەلگىلەرى بار، سوندىقتان ولاردىڭ جىنىسىن انىقتاۋ مۇمكىن بولماعان. بۇل رەتتە جانۋارلار تەرىسىنىڭ جوعارعى قاباتىندا وق پەن تەسىلگەن جەردىڭ ىزدەرى تابىلماعان.
"ولگەن كيىكتەردىڭ ولەكسەلەرى سۋدان الىنىپ، ارنايى پوليگونعا جەتكىزىلىپ، جويىلدى. كيىكتەردىڭ جاپپاي قىرىلۋىنا وزەننەن ءوتۋ كەزىندە سۋعا باتىپ كەتۋ سەبەپ بولعان", - دەلىنگەن ەكولوگيا مينيسترلىگىنىڭ حابارلاماسىندا.