اقش ۇشاقتارى تالىبتەرگە سوققى جاسادى

6708
Adyrna.kz Telegram

پەنتاگون وكىلى دجون كەربي ءباسپاسوز كونفەرەنتسياسى بارىسىندا اقش اسكەريلەرى تاليباننىڭ ۇرىس پوزيتسيالارىنا، سونىڭ ىشىندە ستراتەگيالىق ماڭىزى بار قانداعار پروۆينتسياسىنداعى تالىبتەرگە اۋەدەن سوققى جاساعانىن مالىمدەدى. 

Khaama اگەنتتىگىنىڭ سوزىنە قاراعاندا، اۋە شابۋىلدارى اۋعانستاننىڭ ۇلتتىق قورعانىسى مەن قاۋىپسىزدىك كۇشتەرىن قولداۋ ماقساتىندا جانە تاليبان قولعا تۇسىرگەن اسكەري تەحنيكانى جويۋ بويىنشا ىسكە اسقان. سوققىلار تالىبتەر باسىپ العان ارتيللەريالىق قارۋ تۇرلەرى، كولىكتەر مەن تانكتەرگە جاسالعان. ۇشاقتاردىڭ قايدان كەلگەنى ايتىلمادى. تاياۋ شىعىستا اقش ۇشاقتارى ورنالاستىرىلعان اۋەجايلار جەتكىلىكتى. سوققىلار اۋعانستان بيلىگىنىڭ سۇرانىسى بويىنشا جاسالعان.

اقش قورعانىس ءمينيسترى للويد وستين پەنتاگونداعى ءباسپاسوز كونفەرەنتسياسىندا اقش ۇكىمەتى اۋعانستان قاۋىپسىزدىك كۇشتەرى مەن اۋعانستان ۇكىمەتىنە كومەكتەسۋگە بەل بۋعانىن ايتتى.

وستين سونىمەن قاتار ايماقتا اقش-قا قاۋىپ توندىرەتىن اۋعانستاننان شىعاتىن كەز-كەلگەن ىقتيمال تەرروريزم مەن زورلىق-زومبىلىقتى قاداعالاپ قانا قويماي، سونىمەن قاتار قاۋىپ تونگەن جاعدايدا شارا قولدانۋعا قابىلەتتى ەكەندىكتەرىن ايتتى.

"ادىرنا" ۇلتتىق پورتالى

 

پىكىرلەر