پارلامەنت سەناتىنىڭ دەپۋتاتى نۇرتورە ءجۇسىپ Facebook-تەگى پاراقشاسىندا ريم پاپاسىنىڭ دومبىرا تۋرالى ايتقانىن جازدى، دەپ حابارلايدى “ادىرنا” ۇلتتىق پورتالى.
«بۇل – باتىرلاردىڭ جەرى، بۇل – ويشىلداردىڭ جەرى، بۇل – سۋرەتشىلەردىڭ، ونەر ادامدارىنىڭ جەرى. بۇل جەر مادەنيەتكە تولى جانە مۇندا قايعىلى وقيعالار دا بولعان. قازاق حالقى باسقا تۇسكەن قانشاما قيىندىقتارعا مويىعان جوق، اسقان قايسارلىقپەن توتەپ بەردى»، – دەدى ريم پاپاسى.
ريم پاپاسى «قازاقستان» كونتسەرت زالىندا الىس جولدان كەلگەنىنە قاراماستان ەلگە ىستىق ىقىلاسىن ءبىلدىرىپ، ءسوز سويلەدى، قازاقتىڭ دومبىراسى تۋرالى پىكىر ءبىلدىردى.
«دومبىرا – قاتتىلىق پەن جۇمساقتىق ۇيلەسىمى. دومبىرانىڭ ەكى ىشەگى – ەجەلگى زامان مەن وسى زاماننىڭ سىرىن شەرتەدى! دومبىرانىڭ ءۇنى – قايشىلاسقان الەمنىڭ – جاۋىزدىق پەن مەيىرىم، سوعىس پەن بەيبىتشىلىك، سۇرەڭسىزدىك پەن سۇلۋلىق اراسىن جالعايتىن ۇيلەسىم» دەگەن مازمۇندا كەرەمەت ءسوز ايتتى. «دومبىرا تۋرالى ايتقانىمدى ەستىپ مەنى مۋزىكانت دەپ قالماڭىزدار. قازاق حالقىنىڭ وسىناۋ جالپاق دالا مەن جالپاق جاھانداعى ومىرسۇيگىش قاسيەتىن ايتۋ ءۇشىن كيەلى اسپاپ ءتىل ۇشىنا ورالدى» دەپ جينالعان جۇرتتى ءبىر سەرپىلتىپ تاستادى. «ەكى ىشەكتىڭ ءبىرىن قاتتى، ءبىرىن ءسال-ءسال كەم بۇرا، ناعىز قازاق – قازاق ەمەس، ناعىز قازاق – دومبىرا» دەگەن قادىر اقىننىڭ ءسوزى الەمدىك تۇلعانىڭ اۋزىنان قايتا جاڭعىرىپ ەستىلگەندە ەرەكشە كۇي كەشەدى ەكەنسىڭ»، – دەپ جازدى نۇرتورە ءجۇسىپ.
