بۇگىن قر پرەزيدەنتى جانىنداعى ورتالىق كوممۋنيكاتسيالار قىزمەتىندە حالىقارالىق «سلاۆيانسكي بازار-2021» ونەر فەستيۆالىنىڭ گران-پري جۇلدەسىنىڭ يەگەرى رۋحيا بايدۇكەنوۆانىڭ قاتىسۋىمەن ءباسپاسوز وتىرىسى وتتى.
XXX-شى ءداستۇرلى حالىقارالىق ونەر بايقاۋى بيىل 14-19-شى شىلدە ارالىعىندا بەلورۋس ەلىنىڭ ۆيتەبسك قالاسىندا وتتى. قازاقستاندىق دەلەگاتسيا ءدۇبىرلى دودادان ەلگە بۇگىن تۇندە ورالدى.
قازاقستان رەسپۋبليكاسىنىڭ مادەنيەت جانە سپورت مينيسترلىگى رۋحيا بايدۇكەنوۆانىڭ حالىقارالىق ارەنادا قازاقستاننىڭ لايىقتى وكىلى بولۋى ءۇشىن قولداۋ كورسەتسە، «حابار» اگەنتتىگى «سلاۆيان بازارى - 2021» حالىقارالىق ونەر فەستيۆالىن تاراتۋ قۇقىعىنا يە باس اقپاراتتىق سەرىكتەسى بولدى.
«قازاق ەلىن بۇل جەڭىسپەن قۇتتىقتايمىن. ءبىز اقپاراتتىق دەمەۋشىلىگىمىزدى فەستيۆالدىڭ اشىلۋ، جابىلۋ سالتاناتتى راسىمدەرىن كورسەتۋ ارقىلى، «حابار»، «حابار 24» ارنالارىنداعى جاڭالىقتاردا حالىققا رۋحيانىڭ جەڭىسى تۋرالى اقپاراتتى تاراتۋ ارقىلى بارىنشا قولداۋ بىلدىرۋگە تىرىستىق. ەلىمىزدىڭ جاس تالانتتارىن «حابار» اگەنتتىگى قاشان دا قولداپ كەلەدى»،- دەدى «حابار» تەلەارناسىنىڭ ديرەكتورى دينارا بيسەمبينا ءباسپاسوز وتىرىسىندا.
30 ەلدىڭ وكىلدەرى باق سىناسقان بايقاۋدىڭ قازىلار القاسى مەن ۇيىمداستىرۋشىلارى، بيىلعى قاتىسۋشىلار اراسىندا باسەكەلەستىكتىڭ اسا جوعارى بولعانىن العا تارتادى. ەكىنشى تۋردا انشىلەر سلاۆيان اندەرىن بەلارۋس ەلىنىڭ باس ديريجەرى ۆيتالي كۋلباكوۆتىڭ باسشىلىعىمەن ورىنداعان.
ءبىرىنشى كونكۋرستىق كۇننەن كەيىن رۋحيا بايدۇكەنوۆا 70 بالدان 69 ۇپاي جينادى. قازىلار القاسىنىڭ رەسەيلىك مۇشەسى سەرگەي پەنكين قازاقستاندىق ورىنداۋشىعا 9 ۇپاي بەرسە، قالعان بارلىق مۇشەسى 10 ۇپايدان بەرگەن.
«قازاق ەلىنە ۇلكەن راقمەت! مەنىڭ ارمانىم ورىندالىپ جاتىر. جەڭىسىمدى حالىقپەن بىرگە تويلاۋ - بالا كۇنگى ارمانىم ەدى. بۇل مەنىڭ عانا ەمەس، بۇكىل قازاقستاننىڭ جەڭىسى دەپ بىلەمىن»،-دەدى «سلاۆيان بازارى-2021» حالىقارالىق ونەر فەستيۆالىنىڭ باس جۇلدەگەرى رۋحيا بايدۇكەنوۆا.
تارتىستى وتكەن بايقاۋدا باس جۇلدەنى قازاق قىزى رۋحيا بايدۇكەنوۆا جەڭىپ الدى. ءبىرىنشى ورىن سەرب قىزى يرينا ارسەنيەۆيچكە بۇيىرسا، ەكىنشى ورىندى ۋكراينالىق رەناتا شتيفەل مەن دانيل مىشكوۆەتس الدى. ۇزدىك ۇشتىكتى سلوۆاك يۆاننا مەن ءازىربايجان وكىلى توفيەك گادجيەۆ قورىتىندىلاعان. ال، بايقاۋدىڭ ارنايى سىيلىعى – «سلاۆيان ءۇمىتىن» سەربيالىق يرينا ارسيەنەۆيچكە بۇيىردى.
ايتا كەتۋ كەرەك، بيىل قازىلار القاسىنىڭ مۇشەلەرى اراسىندا ديماش قۇدايبەرگەن دە بولدى، ول 2015 جىلى «سلاۆيان بازارىنىڭ» باس جۇلدەسىن جەڭىپ العان بولاتىن.
22 جاسار رۋحيا بايدۇكەنوۆا تالدىقورعان قالاسىنىڭ تۋماسى. ول بالا كەزىنەن ۆوكالمەن اينالىسقان. قازىرگى تاڭدا ول قازاق ۇلتتىق ونەر ۋنيۆەرسيتەتىنىڭ «ەسترادالىق ۆوكال» ماماندىعىنىڭ ۇشىنشى كۋرس ستۋدەنتى.جاس ءانشى 2014 جىلى «جاس قانات» رەسپۋبليكالىق جاس ورىنداۋشىلار بايقاۋىنىڭ ءفيناليستى اتانسا، 2015 جىلى «زۆەزدى ەۆرازي» (ەۋرازيا جۇلدىزدارى) جانە «گولوس استانى» (استانا داۋىسى) حالىقارالىق بايقاۋلارىندا ءبىرىنشى ورىندى يەلەنگەن. داۋىس دياپازونىنىڭ كەڭدىگى بەس وكتاۆانى قۇرايدى.
