ماڭعىستاۋ وبلىسىنداعى "قازازوت" زاۋىتىنىڭ اۋماعىندا جاڭا ينۆەستيتسيالىق جوبا جۇزەگە اسىرىلدى. كاسىپورىن اممياك تاسىمالداۋعا ارنالعان 30 ۆاگون ساتىپ الدى دەپ حابارلايدى "ادىرنا" ۇلتتىق پورتالىنىڭ ءتىلشىسى.
جوبانىڭ ماقساتى - سۇيىق اممياكتى تاسىمالداۋعا ارنالعان ۆاگون-تسيستەرنالاردى ساتىپ الۋ جانە پايدالانۋ. بارلىعى 30 ۆاگون ساتىپ الىندى. ارقايسىسىنىڭ جۇك كوتەرگىشتىگى 56 توننانى قۇرايدى. جوبانىڭ قۇنى — 711 ميلليون تەڭگە.
ايتا كەتسەك، "قازازوت" اكتسيونەرلىك قوعامى قازاقستانداعى مينەرالدى ازوت تىڭايتقىشتارىن، ونىڭ ىشىندە اممياكتى وندىرەتىن بىرەگەني كاسىپورىن بولىپ تابىلادى. اممياك حيميا ونەركاسىبىنىڭ ماڭىزدى ونىمدەرىنىڭ ءبىرى جانە قۇرامىندا ازوت بار كوپتەگەن ونەركاسىپتىك زاتتار ءوندىرىسى ءۇشىن شيكىزات رەتىندە قىزمەت ەتەدى.
بۇگىندە كومپانيا كۇن سايىن 650 تونناعا دەيىن اممياك ءوندىرىپ كەلەدى. ساتىپ الىنعان جاڭا ۆاگون-تسيستەرنالار ءوندىرىستى كۇنىنە 750 تونناعا دەيىن ارتتىرۋعا جانە ءونىمنىڭ ۋاقىتىلى تۇتىنۋشىعا دەيىن جەتكىزىلۋىنە مۇمكىندىك بەرەدى.
"قازازوت" اق تەمىرجول تسيستەرنالارى سەرتيفيكاتتالعان جانە مىندەتتى تەكسەرۋدەن جۇيەلى تۇردە وتەدى. اممياك ءوندىرۋشىسى رەتىندە كومپانيا بارلىق قاجەتتى قاۋىپسىزدىك شارالارىن ساقتايدى.
"ادىرنا" ۇلتتىق پورتالى.
