ماڭعىستاۋ وبلىسىندا ەل تاۋەلسىزدىگىنىڭ 30 جىلدىعىنا وراي جازۋشى سماعۇل ەلۋبايدىڭ «اق بوز ءۇي» رومانى بويىنشا فيلم ءتۇسىرىلىپ جاتىر دەپ حابارلايدى "ادىرنا" ۇلتتىق پورتالىنىڭ ءتىلشىسى ماڭعىستاۋ اۋدانى اكىمدىگىنىڭ ءباسپاسوز قىزمەتىنە سىلتەمە جاساپ.
ءتۇسىرىلىم جۇمىستارى 25 مامىردا باستالعان. فيلم 20 ماۋسىمعا دەيىن تۇسىرىلمەك.
كينوكارتينا ءۇشىن الماتىدان ارنايى ارتىستەر شاقىرىلعان. فيلمدە باستى رولدەردىڭ ءبىرىن قازاقستاننىڭ ەڭبەك سىڭىرگەن قايراتكەرى قايرات كەمال سومدايدى. ءفيلمنىڭ رەجيسسەرى — "اق بوز ءۇي" رومانى اۆتورىنىڭ ۇلى بەكارىس ەلۋباي.
"اق بوز ءۇي" — وتكەن عاسىردىڭ 30-جىلدارىنداعى قازاق دالاسىنداعى ۇجىمداستىرۋدىڭ ارتىنان ىلەسە كەلگەن اشارشىلىق جىلدارىن سۋرەتتەيتىن ادەبي شىعارما. كينو تىلىنە تۇسىرىلگەن تۋىندى ەل باسىنا تۇسكەن ناۋبەتتى ءبىر اۋلەتتىڭ تاريحى رەتىندە باياندالادى. ءتۇسىرىلىم جۇمىستارىن ۇشتاعان اۋىلىنان باستاپ كەتتىك. اۋىل تۇرعىندارى ۇلكەن ىقىلاسپەن ءتۇسىرىلىم توبىنا قاتىسىپ، ءوز كومەكتەرىن كورسەتىپ جاتىر",-دەيدى رەجيسسەر بەكارىس ەلۋباي.
قازاق ەلىنىڭ اشارشىلىقتان قىرىلعان اۋىر كەزەڭى باياندالاتىن تاريحي فيلم 2022 جىلدىڭ ناۋرىز ايىندا كورەرمەنگە جول تارتپاق.
ايتا كەتۋ كەرەك، سماعۇل ەلۋبايدىڭ «اق بوز ءۇي» تريلوگياسى ءوزىنىڭ كوركەم قۇرىلىمى، سۋرەتتىلىگىمەن دە ەرەكشەلەنەدى. سماعۇل ەلۋبايدىڭ جازۋشىلىق شەبەرلىگى وسى شىعارماسىنان ايقىن كورىنەدى. روماننىڭ جازىلۋىنا باستى سەبەپ – كەڭەس كەزىندەگى اشارشىلىققا ۇشىراعان حالىقتىڭ حال-احۋالى. «اسىرا سىلتەۋدىڭ» ىقپالى ايبارلى اجداھاداي ەل ءىشىن ءبىرشاما كۇيزەلتتى. ەل باسقارىپ وتىرعانداردىڭ وسىنداي جۇعىمسىز قىلىقتارىن، پاسىقتىعىن شىنايىلىقپەن كورسەتە كەلىپ، ادىلەتتىلىككە ۇندەيدى. شىعارما استارى زامانىنىڭ جاقسىلارى – ءبىلىمدى، پاراساتتى دانا ادامدار، ەل قامىن جەگەن ەرلەر، بەرەكە-بىرلىكتى ۇستانعان جاندار دەگەندى ۇعىندىرادى. سول كەزەڭدەگى ەلدىڭ اۋىر تۇرمىسىن، حالىقتىڭ باسىنا تۇسكەن قيىنشىلىقتاردى، جۇت بولعان اۋىر جىلدار قاسىرەتىن جازۋشى شىنايىلىلىقپەن سۋرەتتەگەن.
مىنەكەي، وسىنداي ىزدەنىستەر ناتيجەسىندە «اق بوز ءۇي» تريلوگياسى جازىلدى. رومانعا ارقاۋ بولعان نەگىزگى جاعداي – 1930 جىلداردىڭ اپاتى، ناۋبەتتى زاماننىڭ شىرعالاڭى.
"ادىرنا" ۇلتتىق پورتالى.
