Mańǵystaý oblysynda el táýelsizdiginiń 30 jyldyǵyna oraı jazýshy Smaǵul Elýbaıdyń «Aq boz úı» romany boıynsha fılm túsirilip jatyr dep habarlaıdy "Adyrna" ulttyq portalynyń tilshisi Mańǵystaý aýdany ákimdiginiń baspasóz qyzmetine silteme jasap.
Túsirilim jumystary 25 mamyrda bastalǵan. Fılm 20 maýsymǵa deıin túsirilmek.
Kınokartına úshin Almatydan arnaıy ártister shaqyrylǵan. Fılmde basty rólderdiń birin Qazaqstannyń eńbek sińirgen qaıratkeri Qaırat Kemal somdaıdy. Fılmniń rejısseri — "Aq boz úı" romany avtorynyń uly Bekarys Elýbaı.
"Aq boz úı" — ótken ǵasyrdyń 30-jyldaryndaǵy qazaq dalasyndaǵy ujymdastyrýdyń artynan ilese kelgen asharshylyq jyldaryn sýretteıtin ádebı shyǵarma. Kıno tiline túsirilgen týyndy el basyna túsken náýbetti bir áýlettiń tarıhy retinde baıandalady. Túsirilim jumystaryn Ushtaǵan aýylynan bastap kettik. Aýyl turǵyndary úlken yqylaspen túsirilim tobyna qatysyp, óz kómekterin kórsetip jatyr",-deıdi rejısser Bekarys Elýbaı.
Qazaq eliniń asharshylyqtan qyrylǵan aýyr kezeńi baıandalatyn tarıhı fılm 2022 jyldyń naýryz aıynda kórermenge jol tartpaq.
Aıta ketý kerek, Smaǵul Elýbaıdyń «Aq boz úı» trılogııasy óziniń kórkem qurylymy, sýrettiligimen de erekshelenedi. Smaǵul Elýbaıdyń jazýshylyq sheberligi osy shyǵarmasynan aıqyn kórinedi. Romannyń jazylýyna basty sebep – keńes kezindegi asharshylyqqa ushyraǵan halyqtyń hal-ahýaly. «Asyra silteýdiń» yqpaly aıbarly ajdahadaı el ishin birshama kúızeltti. El basqaryp otyrǵandardyń osyndaı juǵymsyz qylyqtaryn, pasyqtyǵyn shynaıylyqpen kórsete kelip, ádilettilikke úndeıdi. Shyǵarma astary zamanynyń jaqsylary – bilimdi, parasatty dana adamdar, el qamyn jegen erler, bereke-birlikti ustanǵan jandar degendi uǵyndyrady. Sol kezeńdegi eldiń aýyr turmysyn, halyqtyń basyna túsken qıynshylyqtardy, jut bolǵan aýyr jyldar qasiretin jazýshy shynaıylylyqpen sýrettegen.
Minekeı, osyndaı izdenister nátıjesinde «Aq boz úı» trılogııasy jazyldy. Romanǵa arqaý bolǵan negizgi jaǵdaı – 1930 jyldardyń apaty, náýbetti zamannyń shyrǵalańy.
"Adyrna" ulttyq portaly.
