پرەزيدەنت قاسىم-جومارت توقاەۆ ۇكىمەتكە قازاقستاندا كوروناۆيرۋسقا قارسى كۇرەس بويىنشا جەدەل جوسپار قۇرۋعا جانە ۆاكتسينا العان ادامدار سانىن كوبەيتۋگە ءبىر اي ۋاقىت بەردى، - دەپ حابارلايدى “ادىرنا” ۇلتتىق پورتالى اقورداعا سىلتەمە جاساپ.
"بۇگىن كوتەرىلگەن بارلىق ماسەلە ۇكىمەتتىڭ ەرەكشە باقىلاۋىندا بولۋى ءتيىس. جەدەل ءىس-قيمىلدىڭ ناقتى جوسپارى قاجەت. قابىلدانعان شارالار تۋرالى ءبىر اي مەرزىمدە بايانداما جاساۋدى سۇرايمىن", - دەدى توقاەۆ.
توقاەۆ پرەمەر-مينيستر، ۆەدومستۆو باسشىلارى، قالا مەن وبلىس اكىمدەرى قاتىسقان جۇمىس كەڭەسىندە كوروناۆيرۋسپەن كۇرەس، انتيۆاكسەرلەر پروبلەماسى، وڭىرلىك اۋرۋحانالاردىڭ تومەن دەڭگەيدە جاراقتانۋى، كارانتين رەجيمىن بۇزاتىن ادامداردىڭ جازاسىز قالۋى، سونداي-اق، ۆاكتسيناتسيا پاسپورتتارىن قولدان جاساۋ جانە پتر-تالداۋلار ماسەلەسىن كوتەردى.
مەملەكەت باسشىسى قازاقستانداعى ەپيداحۋال ناشارلاپ بارا جاتقانىن ايتتى.
سونىمەن قاتار، پرەزيدەنت قازاقستاننىڭ كەيبىر ايماعىندا كوروناۆيرۋسقا قارسى ۆاكتسينا دۇرىس ساقتالماعانىن، سالدارىنان پرەپارات تيىمدىلىگى تومەندەگەنىن اتاپ ءوتتى.
ول ۆاكتسينامەن از قامتىلعان وڭىرلەرگە كومەك كورسەتۋ ءۇشىن كوشپەلى بريگادالار قۇرۋدى تاپسىردى.
سونداي-اق، قاسىم-جومارت توقاەۆ قازاقستاندىقتاردى جاقىندارىنىڭ اماندىعىن ويلاۋعا شاقىردى.
