(سيرەك سۋرەتتىڭ سىرى)
1999 جىلى كۋبا بوكسىنىڭ مايتالماندارى قازاق جەرىنە كەلىپ، بىرلەسكەن كوماندالىق جاتتىعۋ وتكىزدى. سولاردىڭ ورتاسىندا بوكستىڭ بايتەرەگى، ءۇش دۇركىن وليمپيادا چەمپيونى، اتاقتى تەوفيلو ستيۆەنسون ءجۇردى. وسى ساپارىندا توبەسى كوك تىرەگەن تەگەۋرىندى تەوفيلو جۋرناليستەرمەن دە جۇزدەستى. جان-جاقتان سۇراقتى جاۋدىرا جونەلدىك.
"جالپى، بۇل ومىردە نەدەن قورقاسىز؟" - دەپ ازىلدەپ سۇراق قويعان ارىپتەسىمىزگە "ايەلىمنەن قورقام. ول - ءبىزدىڭ قالانىڭ پروكۋرورى" - دەپ قارىمتا قالجىڭمەن جاۋاپ بەردى. سول جولى تىسقاققان تەوفيلونىڭ جويقىن سوققىنى عانا ەمەس، ءتىلى مەن جاعىنا سۇيەنگەن تىلشىلەردىڭ شابۋىلىن دا تويتارىپ تاستاي الاتىنىنا كوز جەتكىزگەنبىز. ايتپاقشى، الاتاۋدىڭ ەتەگىندە اياعىن سىلتىپ باسىپ جۇرگەن ستيۆەنسوندى سپورتشىلار دارىگەرى جەڭىس ايازبەكوۆ اعامىز كورىپ قالىپ، باس-اياعى جيىرما كۇن ىشىندە ءىز قالدىرماي ەمدەپ جىبەرگەن كورىنەدى. سول كۇندەردە تۇسكەن سۋرەت...
الپامساداي ءابدىسالان اعام، ايگىلى باپكەر تۇرسىنعالي ەدىلوۆ، بەلگىلى سپورت ءجۋرناليسى قىدىربەك رىسبەكوۆتىڭ كۋبا بوكسىنىڭ ارىستانىن ورتاعا الىپ تۇرا قالعان ءساتى. بۇرىنعى ءبىر ءسات - بۇگىنگى تۇتاس تاريح!
باۋىرجان ومارۇلى
