جەلىدە قازاقستاندىق ءۇش قىزدىڭ ىستانبۇلداعى مەيرامحانالاردىڭ بىرىندە توبەلەس ورتاسىندا جۇرگەن ۆيدەوسى تارادى.
ۆيدەودا بىرنەشە ەر ادامدىڭ قىزدىڭ شاشىنان سۇيرەپ، سىرتقا شىعارىپ جاتقانى تۇسىرىلگەن. تۇرىك باسىلىمدارىنىڭ حابارلاۋىنشا، كەيىن قازاقستاندىق بويجەتكەن قاماۋعا الىندى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
تۇركيانىڭ Milliyet باسىلىمىنىڭ حابارلاۋىنشا، وقيعا بولعان كۇنى قازاقستاندىق قىز بەن ونىڭ ادۆوكاتى رەسمي مالىمدەمە جاسادى. بويجەتكەننىڭ سوزىنشە، ول قۇربىسى ۇلبولسىن مالعاجاروۆامەن بىرگە ول جەرگە كوڭىل كوتەرۋ ءۇشىن بارعان. الايدا ولاردى جەڭىل ءجۇرىستى قىز دەپ ويلاعان مەيرامحانا قىزمەتكەرى قىزداردىڭ تەلەفون ءنومىرىن سۇراعان. الايدا قىزدار ءنومىرىن بەرۋدەن باس تارتقان.
«ول قۇربىمنىڭ باسىنان ۇرىپ، سودان كەيىن ىشكە الىپ كەتىپ، ۇرىپ-سوعا باستادى. مەن پوليتسيانىڭ ءنومىرىن تەرىپ، ولارعا تەلەفونىمدى كورسەتتىم. سودان كەيىن ولار مەنى دە ۇرا باستادى. قۇربىمنىڭ شاشىنان تارتتى، ەكىنشىسى اۋزىن اشۋعا تىرىستى، سودان كەيىن قۇربىم امالسىز ونىڭ قولىن تىستەپ الدى»، - دەيدى بويجەتكەن.
سودان كەيىن تۇركيادا اسپاز بولىپ جۇمىس ىستەيتىن ۇلبولسىن مالعاجاروۆانى پوليتسيا الىپ كەتىپ، قاماعان. ونىڭ ادۆوكاتى نەبيكان ورحان سوتقا اقپارات پەن ۆيدەونى جيناپ، قاماۋدان بوساتۋدى سۇرادى.
«كليەنتىم قاماۋدا وتىر. ولار 3-4 رەت تەلەفون سۇراعان، سوعان بايلانىستى جانجال شىققان. دارەتحاناعا بارا جاتقاندا تاعى دا ءنومىرىن سۇراعان. قىز سول كەزدە شاعىم تۇسىرەمىن دەپ تەلەفونىن شىعارعان، ول تەلەفونىن تارتىپ العان. ۆيدەودا ءبىر ەر ادامنىڭ مەنىڭ كليەنتىمنىڭ شاشىنان ۇستاپ تۇرعانى، ال ەكىنشى كۇزەتشى ەكى قولىن اۋزىنا سالعانى تۇسىرىلگەن. قازىر قاماۋدا وتىرعانىنا بايلانىستى شاعىم تۇسىردىك، مۇمكىندىك بولا سالىسىمەن بوساتادى دەپ ۇمىتتەنەمىز»، - دەدى اۆدوكات نەبيكان ورحان.
ال قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەكۇلى جاعدايعا بايلانىستى پىكىر ءبىلدىردى. ونىڭ سوزىنشە، ماسەلە بويىنشا قازاقستاننىڭ ىستانبۇلداعى باس كونسۋلدىعى اينالىسىپ جاتىر.
«بىزگە ازاماتتارىمىزدان شاعىم تۇسپەسە دە، ءجابىر كورگەن قىزدارىمىزدى ىزدەپ تاپتىق. قاماۋداعى ازامات بويىنشا كونسۋلدىق كومەك كورسەتىپ جاتىر. ىستانبۇل قالاسى ىشكى ىستەر باسقارماسى باسشىسى جانە وقيعا بولعان اۋداندىق ىشكى ىستەر باسشىسىنا ماسەلەنىڭ ءادىل قاراستىرىلۋى بويىنشا تالاپ جەتكىزىلدى. ازاماتتارىمىزدىڭ قۇقىعىن قورعاۋ جۇمىستارى جۇرگىزىلۋدە»، - دەپ جازدى ساپاربەكۇلى.
«ارينە كىناسى بار-جوق ەكەنىنە قاراماستان قىز بالاعا مۇنداي زورلىق-زومبىلىق ءۇشىن وكىنىش ءبىلدىرىپ جاتقان تۇرىك اعايىندار دا وتە كوپ. سابىر ساقتاپ، جەكەلەگەن ادامداردىڭ ارەكەتى ءۇشىن بۇكىل حالىقتى ايىپتاۋدان اۋلاق بولايىق»، - دەپ جازدى قازاقستاننىڭ تۇركياداعى ەلشىسى.
"ادىرنا" ۇلتتىق پورتالى
