Jelide qazaqstandyq úsh qyzdyń Ystanbuldaǵy meıramhanalardyń birinde tóbeles ortasynda júrgen vıdeosy tarady.
Vıdeoda birneshe er adamdyń qyzdyń shashynan súırep, syrtqa shyǵaryp jatqany túsirilgen. Túrik basylymdarynyń habarlaýynsha, keıin qazaqstandyq boıjetken qamaýǵa alyndy, dep habarlaıdy «Adyrna» ulttyq portaly Sputnik Qazaqstan saıtyna silteme jasap.
Túrkııanyń Milliyet basylymynyń habarlaýynsha, oqıǵa bolǵan kúni qazaqstandyq qyz ben onyń advokaty resmı málimdeme jasady. Boıjetkenniń sózinshe, ol qurbysy Ulbolsyn Malǵajarovamen birge ol jerge kóńil kóterý úshin barǵan. Alaıda olardy jeńil júristi qyz dep oılaǵan meıramhana qyzmetkeri qyzdardyń telefon nómirin suraǵan. Alaıda qyzdar nómirin berýden bas tartqan.
«Ol qurbymnyń basynan uryp, sodan keıin ishke alyp ketip, uryp-soǵa bastady. Men polıııanyń nómirin terip, olarǵa telefonymdy kórsettim. Sodan keıin olar meni de ura bastady. Qurbymnyń shashynan tartty, ekinshisi aýzyn ashýǵa tyrysty, sodan keıin qurbym amalsyz onyń qolyn tistep aldy», - deıdi boıjetken.
Sodan keıin Túrkııada aspaz bolyp jumys isteıtin Ulbolsyn Malǵajarovany polıııa alyp ketip, qamaǵan. Onyń advokaty Nebıkan Orhan sotqa aqparat pen vıdeony jınap, qamaýdan bosatýdy surady.
«Klıentim qamaýda otyr. Olar 3-4 ret telefon suraǵan, soǵan baılanysty janjal shyqqan. Dárethanaǵa bara jatqanda taǵy da nómirin suraǵan. Qyz sol kezde shaǵym túsiremin dep telefonyn shyǵarǵan, ol telefonyn tartyp alǵan. Vıdeoda bir er adamnyń meniń klıentimniń shashynan ustap turǵany, al ekinshi kúzetshi eki qolyn aýzyna salǵany túsirilgen. Qazir qamaýda otyrǵanyna baılanysty shaǵym túsirdik, múmkindik bola salysymen bosatady dep úmittenemiz», - dedi avdokat Nebıkan Orhan.
Al Qazaqstannyń Túrkııadaǵy tótenshe jáne ókiletti elshisi Abzal Saparbekuly jaǵdaıǵa baılanysty pikir bildirdi. Onyń sózinshe, másele boıynsha Qazaqstannyń Ystanbuldaǵy Bas konsýldyǵy aınalysyp jatyr.
«Bizge azamattarymyzdan shaǵym túspese de, jábir kórgen qyzdarymyzdy izdep taptyq. Qamaýdaǵy azamat boıynsha konsýldyq kómek kórsetip jatyr. Ystanbul qalasy ishki ister basqarmasy basshysy jáne oqıǵa bolǵan aýdandyq ishki ister basshysyna máseleniń ádil qarastyrylýy boıynsha talap jetkizildi. Azamattarymyzdyń quqyǵyn qorǵaý jumystary júrgizilýde», - dep jazdy Saparbekuly.
«Árıne kinási bar-joq ekenine qaramastan qyz balaǵa mundaı zorlyq-zombylyq úshin ókinish bildirip jatqan túrik aǵaıyndar da óte kóp. Sabyr saqtap, jekelegen adamdardyń áreketi úshin búkil halyqty aıyptaýdan aýlaq bolaıyq», - dep jazdy Qazaqstannyń Túrkııadaǵy elshisi.
"Adyrna" ulttyq portaly
