اقتاۋلىق بلوگەر ازامات سارسەنباەۆ ماڭعىستاۋ وبلىسىندا شارۋالار مالعا قالاي كارتون بەرەتىنىن كورسەتتى. ونىڭ ايتۋىنشا، ۇنەمدەۋ ءۇشىن مالدارعا كارتونعا كەبەك بەن قالدىق قوسىپ بەرەدى ەكەن، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
ازامات سارسەنباەۆ Facebook جەلىسىندەگى پاراقشاسىندا اقتاۋدان 350 شاقىرىم جەردە ورنالاسقان اقشىمىراۋ اۋىلىنان شاعىن فوتوەسەپ جاريالاعان. ول جەرگىلىكتى شارۋالار مالداردىڭ جەم-شوبىنە كارتوندى قالاي قوسىپ بەرەتىنىن كورسەتكەن.
قۋاڭشىلىققا بايلانىستى قىمباتتاپ كەتكەن ءشوپتى ۇنەمدەۋ ءۇشىن شارۋالار كارتوندى سۋعا ەزىپ، سوسىن ەرىگەن كارتوندى كەبەكپەن جانە قالدىقتارمەن ارالاستىرىپ بەرەدى.
جەلى قولدانۋشىلارى مۇنداي تەحنولوگيا باياعىدان قولدانىلىپ كەلە جاتقانىن جازعان. جەم-شوپكە كارتون قوسىپ بەرۋ جانۋارلاردىڭ اس قورىتۋ جۇيەسىنىڭ قالىپتى جۇمىس ىستەۋىنە اسەر ەتەدى ەكەن.
ەسكە سالايىق، ماۋسىمدا ماڭعىستاۋ وبلىسىندا تۇرعىندار مالعا ءشوپ ورنىنا كارتون بەرىپ جۇرگەنى تۋرالى اقپارات تاراعان بولاتىن. الەۋمەتتىك جەلىلەردە تۇيەلەر مەن جىلقىلاردىڭ كارتون جەپ تۇرعانى تۇسىرىلگەن ۆيدەو تارالدى. ۆيدەو اۆتورىنىڭ ايتۋىنشا، فەرمەرلەر قيىن جاعدايدان وسىلاي شىعۋعا ءماجبۇر. ول وڭىردە جەم-ءشوپ تاپشى ەكەنىن ايتادى. سونداي-اق، ۆيدەودا بيىل جاۋىن-شاشىن بولماي جايىلىمدار قۇرعاپ قالعانى ايتىلعان.
ارتىنشا جانۋارلار دۇنيەسى بويىنشا قازاقستاندىق عالىم نۇرادين الىباەۆ بۇل دۇرىس ەمەس ەكەنىن جانە ول تۇيەلەرگە زيان بولۋى مۇمكىن ەكەنىن ايتقان ەدى. عالىمنىڭ ايتۋىنشا، جانۋارلاردىڭ تاماعىندا ميكروەلەمەنتتەر بالانسى بولۋى كەرەك، ولاردى بۇلاي اسىراعان دۇرىس ەمەس.
