Aqtaýlyq bloger Azamat Sársenbaev Mańǵystaý oblysynda sharýalar malǵa qalaı karton beretinin kórsetti. Onyń aıtýynsha, únemdeý úshin maldarǵa kartonǵa kebek ben qaldyq qosyp beredi eken, - dep habarlaıdy “Adyrna” ulttyq portaly Tengrinews.kz saıtyna silteme jasap.
Azamat Sársenbaev Facebook jelisindegi paraqshasynda Aqtaýdan 350 shaqyrym jerde ornalasqan Aqshymyraý aýylynan shaǵyn fotoesep jarııalaǵan. Ol jergilikti sharýalar maldardyń jem-shóbine kartondy qalaı qosyp beretinin kórsetken.
Qýańshylyqqa baılanysty qymbattap ketken shópti únemdeý úshin sharýalar kartondy sýǵa ezip, sosyn erigen kartondy kebekpen jáne qaldyqtarmen aralastyryp beredi.
Jeli qoldanýshylary mundaı tehnologııa baıaǵydan qoldanylyp kele jatqanyn jazǵan. Jem-shópke karton qosyp berý janýarlardyń as qorytý júıesiniń qalypty jumys isteýine áser etedi eken.
Eske salaıyq, maýsymda Mańǵystaý oblysynda turǵyndar malǵa shóp ornyna karton berip júrgeni týraly aqparat taraǵan bolatyn. Áleýmettik jelilerde túıeler men jylqylardyń karton jep turǵany túsirilgen vıdeo taraldy. Vıdeo avtorynyń aıtýynsha, fermerler qıyn jaǵdaıdan osylaı shyǵýǵa májbúr. Ol óńirde jem-shóp tapshy ekenin aıtady. Sondaı-aq, vıdeoda bıyl jaýyn-shashyn bolmaı jaıylymdar qurǵap qalǵany aıtylǵan.
Artynsha janýarlar dúnıesi boıynsha qazaqstandyq ǵalym Nuradın Álibaev bul durys emes ekenin jáne ol túıelerge zııan bolýy múmkin ekenin aıtqan edi. Ǵalymnyń aıtýynsha, janýarlardyń tamaǵynda mıkroelementter balansy bolýy kerek, olardy bulaı asyraǵan durys emes.
