بۇل جىلى الەمنىڭ كوپتەگەن سپورتشىلارى ءۇشىن ەڭ ماڭىزدى جىل. 23 شىلدە مەن 8 تامىز ارالىعىندا جاپونيانىڭ توكيو قالاسىندا 32-ءشى جازعى وليمپيادا ويىندارى وتەدى. شىمكەنت قالاسىنىڭ قورجىنىندا بۇگىنگى كۇنى سپورتتىڭ 7 ءتۇرى بويىنشا 11 وليمپيادالىق ليتسەنزيا بار.
قالا اكىمى مۇرات ايتەنوۆ ليتسەنزيا يەگەرلەرى مەن ولاردىڭ جاتتىقتىرۋشىلارىن قابىلدادى. كەزدەسۋدە الداعى جاۋاپتى جارىسقا ساتتىلىك تىلەپ، جەڭىسپەن كەلۋلەرىنە سەنىم ءبىلدىردى.
- سپورت - بۇل ەلدىڭ بەدەلى مەن ابىرويىنا جۇمىس ىستەيتىن سالا. تاۋەلسىزدىك جىلدارىندا ءبىزدىڭ سپورتشىلار بىرنەشە رەت ءىرى حالىقارالىق جارىستاردا جەڭىسكە جەتتى. وسى جەڭىستەردىڭ قۇرمەتىنە قازاقستاننىڭ تۋى ماقتانىشپەن كوتەرىلدى. سپورتشىلارىمىز - ءبىزدىڭ ماقتانىشىمىز. ءبىز سىزدەردىڭ ارقايسىڭىز ءۇشىن جانكۇيەر بولامىز. سىزدەردىڭ جەڭىستەرىڭىزگە سەنەمىز!- دەگەن شاھار باسشىسى اق جول تىلەپ، سپورتشىلارعا اقشالاي سىيلىقتار مەن العىس حاتتار تابىستادى.
ەسكە سالا وتسەك، شىمكەنتتەن ستەند اتۋدان - سارسەنكۋل رىسبەكوۆا، كراۆچەنكو زويا; وق اتۋدان - يۋري يۋركوۆ; كاراتەدەن - دارحان اساديلوۆ، سوفيا بەرۋلتسەۆا، دانيار يۋلداشەۆ; بوكستان - زاكير سافيۋللين; كوركەم گيمناستيكادان - الينا اديلحانوۆا; بايداركا جانە كانوەدەن - سەرگەي ەمەليانوۆ، تيموفەي ەمەليانوۆ; دزيۋدودان - گالبادراح وتگونتسەتسەگ قاتىسادى.
سونىمەن بىرگە، يگور ليگاي حالىقارالىق كۇرەس فەدەراتسياسى تاراپىنان 32-ءشى جازعى وليمپيادا ويىندارىنا قاتىسۋ ءۇشىن تاڭدالدى. گرەك-ريم، ەركىن جانە ايەلدەر كۇرەسىنەن وليمپيادا ساناتىنداعى تورەشى، الەمنىڭ 50 ۇزدىك تورەشىلەرىنىڭ قۇرامىنا كىردى.
شىمكەنت قالاسى اكىمدىگىنىڭ ءباسپاسوز قىزمەتى
