قۋاڭشىلىق باسقان وڭىرلەرگە ءشوپ جەتكىزگەن جىگىت جەلىدە قىزۋ تالقىلانىپ جاتىر

5393
Adyrna.kz Telegram

تۇركىستان وبلىسىنىڭ تۇرعىنى قۇرمەت تالاپقازى مال اشتان قىرىلىپ جاتقان وڭىرلەرگە ءشوپ جەتكىزۋ جۇمىستارىن ۇيىمداستىردى. 24 جاستاعى جىگىت التى ۆاگون ءشوپ پەن تىعىزدالعان جوڭىشقا دايىنداپ قويىپتى. الايدا ءالى دە مالعا قورەك جەتىسپەيدى. بۇل تۋرالى ول Tengrinews.kz تىلشىسىنە ايتىپ بەردى، دەپ حابارلايدى «ادىرنا» ۇلتتىق پورتالى.

قۇرمەت تالاپقازى شىمكەنتتە ساۋدامەن اينالىسادى. اشتان قىرىلعان مال تۋرالى جاڭالىق اۋىر تيگەنىن ايتقان ول ىسكە كىرىسۋدى ۇيعارىپتى. دوستارى مەن ەرىكتىلەردى جيناپ، ءشوپ شابۋدى باستاپ كەتىپتى. قاراجات جيناۋعا دا كىرىسكەن ەكەن.

«حالقىمنىڭ جاعدايى ناشار، اسىرەسە شاعىن شارۋاشىلىقپەن اينالىساتىندارعا قيىن زامان تۋدى، سوعان قۇلازىپ ءجۇرمىن. كومەك باستاپ كەتكەنىمە قۋانامىن، ارينە، بىراق بۇل ماقتانۋ ءۇشىن ەمەس، قۋانۋدىڭ ورنىنا ىسكە كىرىسۋ كەرەك، جۇمىس كوپ. اتا-اجەلەر كوزىنە جاس الىپ، العىسىن جاۋدىرىپ جاتىر، باتاسىن بەردى. بىراق راقمەتىن كۇتپەيمىن، ءاربىر قازاق، ءوز ەلىنىڭ ازاماتى مەنىڭ ءىسىمدى جاسار ەدى. قازىر ءبارىن جينالىپ، كومەكتەسۋگە شاقىرامىن»، - دەپ مالىمدەدى ول.

قۇرمەت تالاپقازى وسىمەن ەكىنشى اپتا بويىندا بارلىق ءىسىن توقتاتىپ قويىپ، ءشوپ شابۋعا كىرىسكەن، تەمىرجولشىلەرمەن جۇك تاسىمالداۋعا كەلىسىم جۇرگىزىپ، مەتسەنات ىزدەستىرىپ جاتىر. وسى كۇنگە دەيىن التى ۆاگون ءشوپ جيناپ، ماڭعىستاۋ مەن باتىس قازاقستان وبلىستارىنىڭ اۋداندارىنا جەتكىزۋمەن اينالىسىپ جاتىر.

«قاراپايىم حالقىمىزدان 1,6 ميلليون تەڭگە ءتۇستى. بۇل قاراجات تولىقتاي جۇمسالدى. ءبىر ۆاگونعا جالپى 610 مىڭ تەڭگە قاجەت ەدى، بىراق ءبىز باعاسىن 380 مىڭ تەڭگەگە دەيىن تۇسىرۋگە كەلىستىك. جەتپەگەنىن قارىزعا الدىق. بۇل قاراجاتتىڭ ءبارى حالىقتىكى، ءىرى بيزنەسمەندەردىڭ ەشقايسى ازىرشە قىرۋار اقشا جىبەرە قويمادى. كومەكتەسەمىز دەگەن، بىراق ءالى جوق»، - دەدى ول.

جىگىت التى ۆاگون ءشوپ ۇزاققا جەتە قويمايتىنىن ايتادى. قىسقا دا مال ازىعىن ىزدەۋ كەرەك.

«قازاقستاننىڭ باتىسىن شوپپەن قازىر قامتاماسىز ەتپەسەك، قىستا مال قىرىلادى. قىستا ءتىپتى باتىستا عانا ەمەس، وڭتۇستىكتە دە، قىزىلوردا مەن ارالدا دا مال قىرىلادى. كەلەسى جىلى ءشوپ تە قىمباتتايدى، ەت تە. قازىر ەتتىڭ كەلىسى ەكى مىڭ تەڭگە بولسا، كەلەسى جىلدارى 7-10 مىڭ تەڭگە بولادى. سوندا بىزدە ەكونوميكالىق ۇلكەن داعدارىس بولادى. كۇز بەن قىس كەلمەي تۇرىپ، ءشوپ ازىرلەۋىمىز كەرەك. ءار وبلىستان 10-15 ۆاگوننان جىبەرسەك جاقسى بولار ەدى. قازىر تۇركىستان مەن شىمكەنتتە قازىعۇرتقا، قاراتاۋعا جانە سوزاققا بارار جولداعى دالانى شاۋىپ جاتىرمىز، سوسىن شىعىس قازاقستان مەن سولتۇستىك قازاقستان وبلىسىنا شوپكە بارامىز»، - دەپ مالىمدەدى ول.

قۇرمەت قاتارىنا كوپ ادام قوسىلعانىن دا ايتىپ وتىر. قازىر باستى پروبلەماسى - كولىك پەن جۇمىسشىلاردىڭ جوعى.

«كوبىنەن اۋىل ادامدارى كومەكتەسىپ جاتىر، تۇك ءشوپ بەرىپ جاتىر. قازىردىڭ وزىندە 50-70-دەي تۇك تىعىزدالعان جوڭىشقا جينادىق. الايدا تاسىمالداۋدا پروبلەما بار. مەملەكەت كومەكتەسىپ جاتقان جوق. ازىرشە اۋىل اكىمدەرى عانا بايلانىسقا شىعىپ جاتىر، بىراق جوعارىداعى بيلىك جاعدايعا نازار اۋدارماي وتىر»، - دەدى ول.

"ادىرنا" ۇلتتىق پورتالى

پىكىرلەر